Xefe Estadu reune ho Membru Konsellu Governu da-34 Seameo Voctech
DILI, 25 outubru 2023 (TATOLI) – Prezidente Repúblika José Ramos Horta, hasoru malu ho membru Konsellu Governu da-34 Seameo Voctech hodi ko’alia kona-ba progresu servisu no implementasaun hosi akordu ho Brunei Darussalam iha tinan 2022.
“Darussalam bele ajuda Timor-Leste iha kualifikasaun edukasaun, ami hakarak ajuda edukasaun Timor-Leste nian, ami mai ne’e tanba kooperasaun ho Ministériu Edukasaun iha Timor-Leste”, Diretór Jerál Seameo Voctech Alias Hj Abu Bakar, dehan ba jornalista sira iha Palásiu Prezidensiál, ohin.
Prezidente Repúblika apresia ho Seameo Voctech tanba bele halo ona kooperasaun ho Timor-Leste iha tinan 2022 iha área edukasaun nian.
‘’Iha ninia serbisu Sultan Brunei mós fó perioridade liuhosi Ministeriu Edukasaun atu espertu sira bele fó treinamentu no kursu ba manorin hosi nasaun membru sira kada tinan. No ba Timor-Leste ita asina ona akordu ida iha tinan kotuk hodi implementa projetu balu ba konsultasaun no dezenvolve manuál hodi hasa’e kualidade no estandarte kurríkulu’’, nia hatete.
Seameo Voctech estabelese iha Brunei Darussalam iha tinan 1990 ho nia objetivu mak atu tulun nasaun membru Seameo sira atu rezolve kestaun komún sira iha edukasaun no formasaun téknika profisionál liuhosi dezenvolvimentu profisionál, peskiza, konsultasaun no diseminasaun informasaun.
Membru husi organizasaun ne’e kompostu husi Ministru Edukasaun iha nasaun membru 11 iha sudeste aziátiku inklui Timor-Leste.
Seameo Voctech inklui hosi Estadu hamutuk 10 ne’ebé eziste iha Brunei Darusalam no prontu apoiu iha aspetu abilidade nian.
Jornalista: Hortencio Sanchez
Editór : Zezito Silva
