DILI, 08 novembru 2023 (TATOLI) - Ministru Interiór (MI), Francisco da Costa Guterres, simu ona relatóriu hosi konfrontu ne’ebé akontese iha Suku Lourba no Carabau, hosi relatóriu ne’e suspeita aknum Polísia Nasionál Timor-Leste (PNTL) envolve diretamente tanba konfrontu ne’e rezulta ema kanek tanba tiru ho bala musan.
“Sim, ha’u simu ona relatóriu ba kazu Lourba no Carabau, hosi relatóriu ne’e mós relata katak iha membru PNTL balun mós envolve inklui ema sira seluk, tanba rezulta ema kanek tanba tiru ho bala-musan, para rona parte hotu, labele dún ba parte ida de’it” Francisco da Costa hateten, ba jornalista sira hafoin remata reuniaun Kosellu Ministru iha Palasiu Governu, kuarta ne’e.
Guterres lakohi fudamenta klean kona-ba oknum membru PNTL na’in hira mak envolve tanba kazu submeter ona ba prosesu investigasaun, ida ne’e mak sei justifika justisa ne’ebé loloos.
“Membru PNTL, tantu sira ne’e sei presta hotu deklarasaun ba kazu ne’e, kona-ba membru PNTL nain hira mak ha’u labele koalia ba públiku, tanba ne’e sei submete ba investigasaun. Ita koalia kona-ba segredu justisa, tanba ne’e maka ha’u labele temi sai ba públiku”, nia adianta.
Nia hateten, Ministériu Interiór no Komandu Jerál PNTL forma ona ekipa investigasaun ba insidente iha kazu Lourba no Carabau bainhira ekipa ne’e finaliza ona ninian investigasaun mak sei fó sai ba públiku.
“Ekipa investigasaun ne’e mai hosi ema kompetente, ema ne’ebé iha kapasidade investigasaun, hosi Departamentu Investigasaun Kriminál, Komandu Jerál PNTL hodi bá halo investigasaun ba kazu ne’e, bainhira ekipa sira ne’e konklui ona sira-nia investigasaun mak sei submete faktus sira ne’e ba Tribunál”, nia afirma.
Komandante Jerál PNTL Komisariu Jerál Polísia Henrique da Costa, hateten kona-ba kazu Lourba no Carabau sei iha hela prosesu investigasaun.
“Investigadór hosi Komandu PNTL Munisípiu Bobonaro no Departamentu Investigasaun Nasionál sei halo investigasaun, prosesu investigasaun sei la’o hela”, nia konklui.
Notísia relevante : PNTL sei investiga ema na’in-hitu deskonfia envolve kazu Lourba-Karabau
Jornalista: Natalino Costa
Editór : Zezito Silva
