DILI, 10 novembru 2023 (TATOLI) – Estudante finalista na’in-11, husi totál 137, ne’ebé laiha diploma orijinál, submete ona sira-nian dokumentu ba Ministériu Edukasaun (ME) hodi halo verifikasaun molok autoriza ba hala’o ezame nasionál segunda xamada.
Alunu sira ne’e, foin lalais ministériu la autoriza sira realiza ezame tanba problema ho dokumentu eskola nian no ME husu sira atu aprezenta diploma hodi bele deside ba ezame tuirmai.
“Ohin, iha na’in-11 maka submete ona sira-nian diploma ba Edukasaun Dili. Ha’u haruka ona ekipa ba rekolla hodi lori mai atu halo uluk verifikasaun”, Inspetora-Jerál, Maria Manuela Gusmão, dehan iha Vila Verde.
Nia esplika husi prosesu verifikasaun ne’e maka identifika sira-nian diploma ne’e orijinál maka sei hetan direitu atu realiza ezame segunda xamada, maibé kuandu sira kontinua falsifika mak Inspesaun Jerál sei foti medida hasoru sira.
“Ita hahú halo ona serbisu sira ne’e tanba hakarak atu garante kualidade edukasaun iha Timór. Ita lakohi estudante finalista sira hakat bá universidade lahatene fali hakerek no lee. Ne’e ita moe”, nia lamenta.
Reponsavel ne’e salienta submisaun diploma husi alunu na’in-11 presiza deskonfia tanba durante ne’e sira lahatama no agora mak foin aprezenta fali dokumentu sira. “Sé mak fó ba sira, depois dokumentu sira ne’e mai husi nivel eskolaridade ida ne’ebé, presiza halo verifikasaun hodi haree ho númeru EMIS sira, nune’e bele foti ninia konkluzaun”, realsa.
Diretór Servisu Edukasaun Munisípiu Dili, Carlito da Silva, informa kazu estudante na’in-137 ne’ebé laiha diploma orijinál ne’e barak liu mai husi Eskola Sekundária Jerál FINANTIL hamutuk 105, maibé iha na’in-tolu mak foin submete ona sira-nian dokumentu no husi Eskola Sekundária Nobel da Paz na’in-10, ualu mak hatama ona dokumentu.
“Estudante na’in-11 ne’ebé submete ona sira-nian dokumentu ne’e hein de’it Inspesaun Jerál sei hala’o lai verifikasaun depois maka fó fali resposta mai ministériu kona-ba diploma sira ne’e”, afirma.
Notísia relevante: Inspetora-Jerál ME: Dirijente eskola ne’ebé falsifika dokumentu sei hetan sansaun
Jornalista: Tomé Amado
Editora: Maria Auxiliadora
