Postu Saúde Kampu Alor rejista moras oioin
DILI, 10 novembru 2023 (TATOLI) – Reponsável Postu Saúde Kampu Alor, Margaretha Moju Bere, hateten Postu Saúde Kampu Alor, daudaun ne’e, rejista moras oioin ne’ebé afeta ba labarik no ema boot sira.
“Husi fulan janeiru to’o mai fulan jullu 2023, ami-nia Postu Saúde Kampu Alor rejista moras oioin hanesan Infesaun Vias Respiratóriu Aguda, moras kulit, hipertensaun no diarea”, Margaretha Moju Bere, dehan iha nia kna’ar fatin Kampu Alor, ohin.
Nia informa, moras hirak ne’e mosu ba labarik no mós ema boot tanba haree klima Timor-Leste nian manas halo moras sira ne’e aumenta barak.
“Moras ISPA ne’e kauza husi klima tanba bailoron naruk, entaun bele halo moras ISPA sa’e makas. Nune’e mós moras kulit sira iha Kampu Alor, aldeia 03 ne’eba, bee mós la sufisiente, depois komunidade sira-nian hela fatin rabat malu liu, entaun hela fatin mós la saudável, hodi bele hamosu moras diarea, moras kulit no mear, iha sira-nia fatin ne’ebé mak hela ba”, nia esplika.
Nia relata, profisionál saúde sira kada fulan tama sai bairo hodi aviza ba komunidade sira kona-ba promosaun edukasaun saúde atu bele redús moras ne’e iha sira nia hela fatin.
“Husi moras sira ne’e, nia prevensaun mak tenke uza maskara, tenke fase liman ho sabaun, ida ne’e mak durante ne’e ami halo promosaun ba komunidade sira, atu bele redús moras sira hanesan, ISPA, diarea no moras kulit”, nia haktuir.
Moras ne’ebé mak aas liu iha fulan hitu nia laran mak, moras ISPA hamutuk 1.272, moras diarea 273 no moras kulit hamutuk 58.
Jornalista : Felicidade Ximenes
Editór : Zezito Silva
