Martinho Correia kontinua lidera Suku Ulmera
LIQUIÇA, 13 novembru 2023 (TATOLI) – Eleisaun Suku ba ronde da-ruak ne’ebé hala’o iha Suku Ulmera, Postu Administrativu Bazartete, Munisípiu Liquiça, Martinho Correia, mantein lidera suku refere.
“Ha’u agradese ba eleitor sira hotu iha Ulmera ne’ebé fó ona konfiansa mai ha’u atu ukun dala ida tan, ha’u sei tau matan ba povu Ulmera hotu ho di’ak, fahe oportunidade hanesan, atende povu hotu kualker tempu”, Martinho dehan ba Agência TATOLI, iha Sede Suku Ulmera, ohin.
Iha eleisaun segunda volta, Martinho kompete ho adversáriu Zeca Soares iha ne’ebé Martinho hetan votu 1,082, no Zeca hetan de’it votu 690, ho nune’e Martinho iha direitu absoluta hodi ukun nafatin.
Rekorda fali katak iha eleisaun primeira volta iha Suku Ulmera hamutuk kandidatura na’in hitu mak kompete maibé rezultadu eleisaun hatudu Martinho Correia no Zeca Soares mak avansa ba segunda volta no finalmente Martinho mak sai nu’udar vensedór hodi ukun Ulmera durante tinan hitu, hahú 2023-2030.
Ulmera kompostu hosi Aldeia hamutuk sia mak hanesan, Ermeta, Esirat, Fatubesilolo, Mane-Muno, Mane-Mori, Nauner, Neran, Titisari no Terlau.
Jornalista: Hortencio Sanchez
Editór : Zezito Silva
