DILI, 15 novembru 2023 (TATOLI) – Prezidente Tribunál Rekursu (TR), Deolindo dos Santos, atualiza servisu Tribunál ba Prezidente Repúblika, José Ramos Horta, iha Palásiu Prezidensiál, ohin.
“Hasoru malu ho Prezidente Repúblika atu ko’alia kona-ba servisu Tribunál nian, atu rona mós ha’u nia hanoin nu’udar Prezidente Tribunál Rekursu no mós Prezidente Konsellu Superiór Majistratura Judisiál oinsa tékniku bele fó hanoin ba Prezidente Repúblika atu bele iha informasaun ne’ebé di’ak atu kria lei Supremu Tribunál Rekursu, tanba iha tempu besik Prezidente Repúblika sei foti desizaun kona-ba komisaun ba lei ne’e prevé”, Prezidente TR dehan.
Nia dehan, ko’alia kona-ba lei, Governu ho Parlamentu bele aprova lei oan ida atu estabelese Supremu Tribunál Rekursu.
”Kona-ba Rekursu Umanu mak ha’u fó hanoin ba Prezidente Repúblika oinsa atu kria Tribunál Rekursu no Supremu Tribunál, agora daudaun ita menus Rekursu Umanu tanba ho númeru Juiz ne’ebé sei limitadu, entaun ita presiza haree didi’ak bainhira komesa Supremu Tribunál karik servisu hotu bele la’o ho di’ak”, nia hakotu.
Juiz hamutuk 22 mak tuir hela prosesu estajiu no iha tinan 2024 sei simu ona tomada posse atu bele responde ona ba númeru Juiz ne’ebé sei limitadu.
Notísia relevante : Edifísiu foun Tribunál iha Caicoli sei inagura iha dezembru
Jornalista: Hortencio Sanchez
Editór : Zezito Silva
