EDUKASAUN, HEADLINE

Estudante finalista 12 iha Dili falta iha ezame segunda xamada

Estudante finalista 12 iha Dili falta iha ezame segunda xamada

Estudante finalista sira tuir ona ezame segunda xamada iha munisipiu Dili..

DILI, 20 novembru 2023 (TATOLI) – Ezame segunda xamada ba estudante sira iha territóriu hahú ona ohin, maibé estudante 12 husi totál 77 iha munisípiu Dili la marka prezensa iha ezame loron dahuluk nian.

Diretór Servisu Edukasaun Munisípiu Dili, Carlito da Silva, informa katak alunu 12 ne’ebé falta ne’e husi eskola bazika terseiru siklu.

“Husi sira na’in-65 ne’e kompostu husi estudante finalista sekundáriu jerál no tekniku vokasional hamutuk 52 tuir hotu kedan. Anulu eskola bazika terseiru siklu hamutuk na’in-25 ne’e, 13 mak mai tuir ona ezame, sei falta na’in-12 maka seidauk”, dehan iha Comoro, ohin.

Edukasaun Dili haruka ona dirijente sira iha kada eskola atu halo kontaktu ho estudante sira ne’ebé seidauk realiza ezame ne’e atubele tuir fali. Entretantu, estudante sira ne’e lakon kontaktu no lahatene sira-nian paradeiru, maibé sira sei iha nafatin oportunidade kuandu iha ona komunikasaun bele realiza fali ezame refere.

“Estudante na’in-12 husi eskola bázika ne’ebé seidauk mai tuir ezame ne’e atu kompleta de’it dixiplina balun ne’ebé sira seidauk kompleta, tanba antes ne’e tuir tiha ona ezame, maibé to’o iha klaran maka de repente enfrenta problema tanba moras, dezastre no família mate”, realsa.

Totál estudante finalista ne’ebé tuir ezame segunda xamada ne’e nia númeru boot liu maka husi Dili hamutuk 77 no 36 husi munisípiu sira seluk.  Daudaun ne’e, Ministériu Edukasaun halo ona korresaun ba pontu ezame sira no data tentativa atu anunsia rezultadu ezame nasionál iha loron 04 dezembru.

Rekorde katak ezame nasionál ba estudante 9.o no 12.o anu realiza tiha ona iha loron 16 no remata iha 18 fulan-outubru ne’e.

Notísia relevante: Ezame segunda xamada ba estudante finalista hala’o iha semana oin

Jornalista: Tomé Amado    

Editora: Maria Auxiliadora

iklan
iklan

Leave a Reply

iklan
error: Content is protected !!