iklan

NASIONÁL, DILI, HEADLINE, KAPITÁL

JICA apoia BTL hadi’a sistema kanalizasaun bee moos iha Dili

JICA apoia BTL hadi’a sistema kanalizasaun bee moos iha Dili

Bee-moos. Imajen/Espesiál

DILI, 21 novembru 2023 (TATOLI) – Agência Koperasaun Internasionál Japaun (JICA, siglá Ingles) serbisu hamutuk ho Bee Timor-Leste, Empreza Públika (BTL,E.P) hodi implementa projetu pilotu hadi’a sistema kanalizasaun bee moos iha área Manleuana, munisípiu Dili.

Objetivu projetu ne’e atu bele kanaliza ho di’ak bee moos no jere bee moos ba kliente sira husi BTL no fasil atu identifika kanalizasaun ilegál.

Kordenadór Projetu JICA, Hiroyuki Nonaka, hateten projetu ne’e implementa iha semana oin no sei la’o durante fulan ida ho balun iha aldeia sira hanesan Lesibutak, mundu Perdidu no rua seluk tan ho totál uma-kain 800.

“Hadi’a kanalizasaun sistema bee moos iha Manleuana ne’e atu garante disponibilidade bee moos durante 24 oras fornese bee ba komuniadde. Projetu sei hahú iha semana oin”, informa Kordenadór Projetu JICA, Hiroyuki Nonaka ba Tatoli, iha Caicoli.

JICA halo ona levantamentu dadus kona-bá problema hanesan populasaun liga ka kanaliza direta bee husi torneira, balun uza saiñu no la taka bee no seluk tan.

Nune’e, JICA prepara ona kanu atu troka hotu ida tuan sira atu populasaun labele kanaliza diretamente.

“JICA hakarak monta kontadór iha kada uma-kain atu asegura bee no apela ba komunidade atu taka bee bainhira la uza, ida ne’e sei garante funsionamentu bee durante 24 oras”, nia fó hanoin.

JICA mós fó apoio mákina hodi troka mákina ne’ebé avaria hodi bele fornese bee ba iha populasaun.

Projetu ne’e ho orsamentu hamutuk $390, ne’ebé rihun $250 husi JICA no rihun $150 husi BTL.

Iha fatin hanesan, Diretór Operasionál no Manutensaun BTL, Aleixo dos Santos, hateten projetu pilotu ne’e importante hodi bele hadi’a kanalizasaun.

“Ita sei kompleta malu, tanba ne’e mak ita serbisu hamutuk hodi bele hadi’a Sistema kanalizasaun. JICA sei prepara kanu sira no BTL mak prepara materiál kanalizasaun ba kada uma-kain”, nia afirma.

Kooperasaun ho JICA atu ajuda mós BTL oinsa bele kontrola ba iha kanalizasaun bee ba populasaun.

Jornalista: Jesuína Xavier

Editór       :  Florencio Miranda Ximenes

iklan
iklan

Leave a Reply

iklan
error: Content is protected !!