NITAG disponibiliza formasaun ba profisionál saúde 20
DILI, 21 novembru (TATOLI) – Komisaun National Imunization Technical Advisor Group (NITAG) fó formasaun ba profisionál saúde hamutuk 20 atu introdús vasina ba pasiente sira.
“Formasaun ida ohin ne’e bolu formasaun vasinalojia signifika siénsia kona -ba imunidade, oinsá mak ema dezenvolve vasina no mós oinsá atu intrudús vasina iha rai ida, entaun formasaun ida-ne’e importante tebes, partisipante sira ne’e mai husi profisionál saúde pediatria HNGV, membru NITAG sira no mós responsavel husi vijilánsia sira, hirak ne’e hamutuk 20”, Prezidente Komisaun NITAG Mariano da Silva Marques, dehan ba jornalista iha Hotel Timor, ohin.
Nia relata, husi formasaun ne’e oinsá atu hasa’e koñesimentu kona-ba oinsa atu foti desizaun, bainhira mak hakarak introdús vasina no tenke hatene prinsípiu no baze husi vasina.
“Sira ne’e servisu barak liu kona-ba vasina, entaun sira tuir tan formasaun ida-ne’e atu bele hasa’e tan sira-nia koñesimentu kona-ba foti desizaun, bainhira ita hakarak introdús vasina ida, tenke hatene prinsípiu baze husi vasina ne’e rasik, katak, vasina ne’e funsaun atu hasa’e ema nia imunidade”, nia esplika.
Iha fatin hanesan, Vise Ministru Fortalesimentu Institusionál, Jose dos Reis Magno, informa formasaun ne’e sei foka ba vasinalojia ba profisionál saúde sira atu fó vasina ba pasiente sira bele ho di’ak.
“Formasaun ne’e importante tanba bele aumenta tan profisionál saúde sira nia hanoin, atu haree kona-ba vasina no mós programa sira seluk ne’ebé mak relasiona ho vasina ne’e rasik”, Jose afirma.
Nia informa, NITAG fó advokasia iha área imunizasaun nian, haree ba vasina sira atu oinsá mak introdúss no implementa.
Reprezentante, Organizasaun Mundiál Saúde iha Timor -Leste Arvind Mathur, informa vasina ne’e sai hanesan xave importante ida, hodi hasoru obstaklu iha saúde globál, nunee mós mantein fó seguru no protesaun ba ema hotu.
“Vasina ne’e meiu ida hodi prevene moras no kontrola moras hadaet sira, depois vasinalojia sai hanesan fundasaun sientífika, bainhira harii estratejia ba imunizasaun”, Arvind Mathur konklui.
Jornalista : Felicidade Ximenes
Editór : Zezito Silva
