Karavana artístika 2023 promove kultura Timor-Leste
DILI, 25 novembru 2023 (TATOLI)–Governu liuhosi Vise Primeiru-Ministru no Ministriu Koordenadó Asuntu Ekónomika no Ministeriu Turizmu no Ambiente, sábadu ne’e, realiza karavana artístika 2023 ho tema “Haburas no Dezenvolve Rai Timor-Leste, Loron Aban Hahú Ohin”.
Karavana artístika 2023 ne’ebé partisipa hosi sosiedade, instituisaun akadémika no munisípiu 14 ho totál grupu hamutuk 34, hodi fó biban ba grupu hirak ne’e enfeita ka májia karreta tuir tradisaun munisipiu ida-idak nian no grupu kriativu sira enfeita karreta tuir sira-nia kriatividade.
Deputada hosi bankada CNRT, Maria Barreto, hateten neventu ne’e konsidera importante tanba atu valoriza kultura Timor-Leste nian no promove joven sira hodi labele haluha Timor-Leste nia identidade.
“Atividade ne’e importante tebes ba povu hotu liuliu komunidade ne’ebé hela iha Dili, ba joven sira atu promove kultura Timor-Leste nian. Tanba, aprezentasaun sira hosi grupu oioin aprezenta ne’e reflete duni ba kultura Timor-Leste nian, sei la ses hosi ita-nia kultura,” deputada CBRT ne’e hateten ba jornalista sira iha Jardin Largo de Lecidere.
Atividade Karavana artístika 2023 ne’e realiza, atu promove mós talentu no kriatividade joven sira-nian hodi promove mós produtu Timor-Leste nian.
Iha fatin hanesan, Martinho Carlos do Rosario, sente kontente tanba bele promove kultura Timor-Leste no halo rame kapitál Dili.
“Nu’udar joven, ha’u sente kontente tebes ba IX Governu ida-ne’e tanba bele kria eventu karavana ne’ebé la la’o tiha durante tinan barak. Ho eventu sira nune’e halo ema hotu kontente hela de’it no hadook sira-nia aan hosi konflitu,” nia hateten.
Tanba ne’e, nia husu ba Governu labele kria de’it eventu karavana maibé kria mós eventu seluk hanesan desportu, konsertu múzika, kompetisaun tradisionál sira kada semana, atu nune’e bele halo ema hotu kontente hadook aan hosi violénsia.
Iha k eventu ne’e. prepara mós ekipa juri hamutuk ema na’in-lima mak hanesan Przidente juri Pe. Dionisio Sarmento, Vise Prezidente Ângela Corovelo, Sekretária Juri Cedelizia dos Santos, Brigida Correia no Zeca Smith nu’udar membru juri hodi observa no deside hosi komboiu karreta hirak ne’e sé mak di’ak-liu, nia mak sei sai hanesan manán na’in.
“Kritéria ne’ebé Ministériu fó mai ami hodi halo analiza hodi deside sé mak manán, hamutuk kriteria neen. Ida mak tenke utiliza aspeitu kulturál no tradisaun Timor-Leste nian, orijinalidade no kriatividade, iha mós aprezentasaun hosi koreiografia, dansa, teatru, katnta, interiatividade ho públiku, adoasaun ba boa pratika ambiente no utiliza materiál sira-ne’ebé la prezudika meiu ambiente no biodiversidade, ikus liu kapasitasaun no mobilizasaun ba ema no eventu,” Przidente juri Pe. Dionisio Sarmento, hateten.
Hosi eventu ne’e, ekipa juri foti desizaun ba manán-na’in sira-ne’ebé hatudu ona sira-nia produtu ho kategoria rua mak hanesan munisipiu no sosiedade, instituisaun akademiku no manán-na’in favoritu iha rua.
Manán-na’in dahuluk mak grupu hosu munisípiu Lautém ne’ebé simu premiu troféu no osan hamutuk $2,500.00, manán-na’in daruak munisípiu Viqueque ne’ebé simu troféu ho osan $2,000.00, manán-na’in datoluk mak Reziaun Administrativu Espesiál Oé-Cusse Ambeno (RAEOA) no kategoria espesiál hosi Manufahi simu troféu ho osan $700.00.
Enkuantu iha kategoria sidadaun no instituisaun akademika ne’e manán-na’in dahuluk mak grupu Catarosa Dili ne’ebé simu troféu ho osan $3,500.00, manán-na’in daruak mak Kriativu Jerman simu troféu ho osan $3,000.00, manán-na’in datoluk mak Junior Bebatua ne’ebé simu troféu ho osan $2,000.00.
Manán-na’in dahaat mak Surik Timor simu troféu ho osan $1,400.00, manán-na’in dalimak mak Raimoris ne’ebé simu troféu ho osan $1,200.00, manán-na’in daneen mak Floresta da Montanha ne’ebé simu troféu ho osan $1,000.00 no manán-na’in favoritu hosi inan Peregrina ne’ebé simu troféu ho osan $700.00.
Responsável manán-na’in primeiru lugar hosi Laletek Catarosa, Elisa Nunes da Rosa, hateten nia parte sente kontente no agradese tanba nia ekipa bele sai manán-na’in ba dahuluk ho osan ne’ebé boot.
“Ha’u sente kontente tebes tnba ami-nia ekipa bele sai manán-na’in. Ami halo preparasaun, halo infeita ba kareta ne’ebé ami uza ne’e durante semana rua maibé ohin ami mai aprezenta hatudu duni rezultadu di’ak, sente kontente tebes,” nia dehan.
Jornalista : Hortencio Sanchez
Editór : Cancio Ximenes
