DILI, 27 novembru 2023 (TATOLI)—Estudante hamutuk 70 no manorin-na’in hamutuk 14 hosi área remota, segunda ne’e, hala’o vizita ba Palásiu Governu hodi hasoru malu ho Primeiru-Ministru (PM), Kay Rala Xanana Gusmão.
Ekipa ne’e simu direta hosi Xefe Governu, akompaña hosi Ministru Prezidénsia Konsellu Ministru, Agio Pereira, no Sekretáriu Estadu Komunikasaun Sosiál, Expedito Dias Ximenes. Hafoin ne’e, tara tais no entrega ai-funan ba estudante ne’ebé ho idade kiik liu entre estudante sira seluk.
Hafoin ne’e, PM Xanana lori estudante sira ba vizita sala Konsellu Ministru, ne’ebé membru Governu sira sempre halo reuniaun kada semana. Momentu ne’e Xefe Governu esplika ba estudante sira kona-ba funsaun salaun reuniaun ne’e, no kontinua diálogu ho estudante sira.
Durante minutu 30, estudante sira aprezenta preokupasaun ligadu ho edukasaun ba Xefe Ezekutivu. Prokupasaun estudante sira-nian maioria ligadu ho falta mobiliáriu no infraestrutura bázika eskola, hanesan laiha morru protesaun iha resintu eskola, laiha haris-fatin, no dalan asesu ba eskola dook.
Estudante hosi munisípiu Aileu, postu administrativu Remesio, Epifânia Amaral da Costa Silva, hateten, sira-nia Eskola Ensinu Báziku (EBF) Aikurus menus profesór.
“Iha klase tolu maibé profesór na’in-rua de’it. Tanba ne’e, ami husu ba Avo Nana karik bele aumenta tan profesór ba ami, tanba ami estudante barak maibé profesór menus,” nia akresenta.
Notísia relevante : PN husu MEJD hamosu Lei regula farda ba Ensinu Primária-Sekundária
Estudante hosi munisípiu Ermera, postu administrativu Atsabe, Noemia Soares, agradese ba Xanana Gusmão tanba fó ona oportunidade ba estudante área remota vizita Palásiu Governu no bele hasoru direta ho Primeiru-Ministru.
“Obrigadu ba Avo Nana tanba fó ona oportunidade baa mi hodi vizita Avo Nana nia servisu fatin. Liuhosi biban ne’e, ha’u lori kolega sira hotu hato’o preokupasaun balun, hakarak dehan ami-nia eskola ladi’ak, kadeira no meza a’at hotu ona, ami-nia estrada kondisaun ladi’ak,” nia tenik.
Nune’e mós, Estudante hosi postu administrativu Laclubar, munisípiu Manatuto, Zelia Soares de Jesus, konvida Xanana Gusmão atu vizita sira-nia eskola EBF Linbote Paralelu Fatulau, hodi haree direta kondisaun.
“Karik Avo Nana tempu iha bele ba vizita ami-nia eskola,” nia husu.
Hatán ba preokupasaun sira ne’e, PM Xanana dehan, ho preokupasaun no halerik sira ne’e maka nia rasik iha hanoin sai Primeiru-Ministru.
“Iha programa IX nian ba tinan-lima maka atu haree ba eskola no saúde tanba edukasaun no saúde buat rua ne’ebé importante tebes atu bainhira imi (estudante) boot mai boot ho matenek no saudável. Ne’e duni maka la’ós atu halo buat hotu-hotu iha tinan-ida de’it maibé neneik-neneik bele rezolve,” PM enkoraja.
Ramata diálogu, Xefe Governu lori estudante sira ne’e ba vizita Gabinete Fronteira Marítima no Kuartel g7+, ne’ebé lokaliza iha Palásiu Governu.
Tékniku Superiór Sosiedade Sivil, iha Palásiu Prezidénsia Repúblika, Vitaliano Leong, haktuir, hosi kada munisípiu, hili estudante lima inklui profesór ida.
Estudante sira ne’e hala’o vizita desde loron 24 to’o 29 novembru 2023, ne’ebé ho maoria ho nível edukasaun primaria.
“objetivu vizita ne’e maka sira bele iha koñesimentu oitoan kona-ba dezenvolvimentu ne’ebé mak daudaun la’o iha nasaun, tanba sira ne’e estudante ne’ebé mai hosi área remota, inisiativa ne’e mai hosi Prezidente Repúblika Ramos Horta”, nia hateten.
Antes vizita Palásiu Governu, estudante sira vizita ona Galeria Viva Prezidente Repúblika Farol, Muzeu Rezisténsia, hafoin kontinua ba Sentru Formasaun Tibar, Portu Tibar, hafoin ne’e hala’o mós vizita ba Parlamentu Nasionál, no aban (tersa) sei partisipa iha komemorasaun loron Proklamasaun Independénsia ba dala-48.
Jornalista : Antónia Gusmão
Editora : Julia Chatarina
