DILI, 27 novembru 2023 (TATOLI)–Prezidente Repúblika (PR) Guiné-Bissau, Umaro Sissoco Embaló, segunda ne’e, hasoru malu ho Primeiru-Ministru, Kay Rala Xanana Gusmão, ne’ebé simu hosi Ministru Negósiu Estranjeiru no Kooperasaun, Bendito Freitas.
“Prezidente Repúblika Guiné-Bissau mai vizita ita hodi hatudu katak sira hamutuk nafatin ho ita, hodi uluk kedas iha funu laran to’o agora, uluk iha funu laran kuandu ita (Timor) kilat musan laiha Amilcar Cabral (líder Guiné-Bissau) mak hahú funu hasoru Portugal, ne’e duni Prezidente mai, mai hatudu sira-nia amizade, laran-luak mai ita hodi dehan katak sira nu’udar maun, tanba sira ukun-an uluk mak Timor-Leste foin ukun-an,” Xanana Gusmão hateten hafoin simu vizita hosi Xefe Estadu Guiñe-Bissau, iha Gabinete Fronteira Marrítima, iha Palásiu Governu.
Notísia relevante : Ekipa misaun apoia hosi TL kontribui reforsa sistema resensiamentu eleitorál Guiné-Bissau
Xanana konsidera Guiñe-Bissau nu’udar amigu boot Timor-Leste tanba hamutuk ona desde tempu difísil to’o agora.
“Hosi tinan 1979, ha’u-nia enkontru ho país tomak no povu tomak, ami hamutuk ho sentena girilleiru iha ai-laran ho arma ne’ebé besik estraga hotu ona, sein munisaun, ida mak ita inspira Gunié-Bissau hodi hanoin halo funu hasoru Portugal no sira konsege manán, maibé ita seidauk. Iha ne’ebá ita hetan enkorajamentu morál hosi sira hanesan motivasaun pesoál no ba girilleiru hotu,” Xanana relembra.
Vizita Xefe Estadu Guiné Bissau la’ós espresa de’it solidariedade, maibé mós aprofunda irmaundade entre Timor-Leste ho Guiné-Bissau, ne’ebé signifika katak bele loke odamatan kooperasaun ne’ebé di’ak liu iha futuru.
Biban hanesan, Prezidente Repúblika Umaro Sissoco Embaló, aproveita vizita Estadu mai Timor-Leste hodi hasoru malu ho Xanana Gusmão.
“Ha’u hala’o vizita Estadu mai Timor-Leste, iha ne’e hakarak mai vizita komandante Xanana. Ne’ebé ha’u mai komprimenta nia nu’udar Primeiru-Ministru, Xanana Gusmão ne’ebé hanesan mós ami-nia líder,” Umaro Sissoco tenik.
Molok Prezidente Repúblika ho delegasaun hakat sai hosi Palásiu Governu, PM Xanana entrega prezente ba Xefe Estadu Umaro Sissoco nu’udar símbolu amizade entre país rua.
Jornalista : Antónia Gusmão
Editora : Julia Chatarina
