DILI, 29 novembru 2023 (TATOLI) – Universidade Dili (UNDIL) sai vensedór ba kompetisaun Informátika, Komunikasaun no Teknolojia (ICT) hodi kriasaun sistema manual ba dijitalizasaun kampu desportiva iha Ministériu Juventude Desportu Arte no Kultura (MJDAK).
Universidade sira ne’ebé partisipa iha kompetisaun ICT ne’e, hanesan Universiadade Oriental Timor Lorosa’e (UNITAL), Universidade Dili (UNDIL), Institutu Of Business (IOB), Díli Institutu Of Tecnology (DIT), Insitutu Superior Cristal (ISC) no Institutu Profissional de Canossa (IPC).
“Primeiru ami foti dadus manuál sira iha MJADK. Ami prepara durante fulan ida no akompaña husi juri tuir rekezitu. Ami kria sistema tama rejistu no membru oinsá bele rekomenda kampu desportiva sira”, dehan reprezentante ekipa UNDIL, Justa Novia, ba Agência TATOLI, iha salaun IOB,Fomentu II-Dili.
UNDIL sai vensedór, nia dehan tanba kria sítiu ida hanaran www.undilhadomitimor.org ne’ebé ema bele klik hodi asesu ba rejistu online ba boking kampu desportiva hosi MJDAK.
Vensedór ba kompetisaun ne’e hetan premiu ho orsamentu $2.000 ne’ebé organiza husi Fundasaun Hadomi Timor no MJDAK.
“Ami kontente tebes tuir kompetisaun tanba bele hetan experiénsia no husu nia maluk juventude sira atu kontinua koko oportunidade sira ne’ebé iha hodi aplika abilidade no konesimentu. Ha’u agradese mós MJDAK no FTH ne’ebé organiza oportunidade kompetisaun iha tinan 2023”, nia afirma.
Ekipa UNDIL sei mellora no aprezenta rekomendasaun sítiu ne’e kona-bá asesu ba pedidu rejistu ba xefia MJDAK nian atu hetan no aproavasaun ba pedidu boking.
Iha fatin hanesan, Xefe Departamentu Empoderramentu Teknolojia husi MJDAK, José António, hateten rezultadu husi kompetisaun ICT husi universitáriu sira ne’e util atu universidade no MJDAK bele uza no sei funsiona rejistu online iha janeiru mai.
Entretantu, kompetisaun sertame ICT ba Nivel Sekundária ne’e nia vensedór mak Eskola Tékniku Vokasionál Becora hanesan primeiru lugar ho osan $200, São Pedro Comoro mak okupa segundu Lugar ho osan $150 no eskola 12 novembru hetan terseiru lugar ho prémiu $120.
Reprezentante ba vensedór sertame Eskola Tékniku Vokasionál Becora, Merilia de Jesus Soares, hateten, lori eskola nia naran tuir kompetisaun no konsidera oportunidade atu aprende di’ak liu tan.
“Ami kontente reprezenta ami nia eskola hodi partisipa iha sertame. Ida ne’e primeira vez ami tuir sertame kona-ba informatika no ne’e ami nia área estudu”, katak nian.
Jornalista: Jesuína Xavier
Editór : Florencio Miranda Ximenes
