iklan

NASIONÁL, DILI, HEADLINE, SOSIEDADE SIVĺL

JSMP observa prosesu formál ba kazu Violénsia Bazea ba Jéneru la’o lentu iha Tribunál

JSMP observa prosesu formál ba kazu Violénsia Bazea ba Jéneru la’o lentu iha Tribunál

Diretor JSMP iha lansamenntu relatoriu survei konaba utilisador no fornesedor sira iha servisu sistema formal nian iha salaun suai room Timor Plaza dili kinta 23 novembru 2023.Foto Tatoli/Antonio daciparu

DILI, 30 novembru 2023 (TATOLI) – Programa Monitorizasaun Sistema Judisiál (JSMP) observa prosesu formál ba kazu Violénsia Bazea ba Jéneru (VBJ) la’o lentu iha Tribunál munisipál no movél sira ho durasaun mínimu kuaze tinan ida.

Observasaun JSMP ne’e ho baze ba peskiza entre marsu no juñu 2023, liuhusi kestionáriu no entrevista ba vítima na’in- 32, arguidu 50 no testemuña ualu, Prokuradór hitu, defensór públiku hitu, no advogadu 12 no juíz na’in-haat no ofisial Tribunál haat inklui ema na’in-8 husi Tribunál Movél.

“Ita sei rekomenda atubele hadi’ak iha futuru. Peskiza ne’e halo liuhosi entrevista verbál, hodi halibur informasaun kona-ba perspetiva sira hosi grupu respondente vítima, arguidu no advogadu no ofisial justisa, defensór no juiz. Hosi ne’e, Um tersu korespondente refere prosesu prosesu husi Tribunál neneik ka neneik tebes tanba durasaun média ba prosesu fulan 11 loron 26″, dehan Diretora Ezekutiva JSMP, Ana Paula Marcál ba Agência TATOLI.

Peskiza ho tema “Persepsaun no satisfasaun utilizadór no fornesedór serbisu iha sistema justisa formál iha ba kazu sira”. Ho objetivu hosi peskiza ne’e mak atu esplora ho kle’an informasaun kona-ba serbisu no funsionamentu setór justisa ba utilizadór serbisu tribunál no fornesedór serbisu tribunál iha kazu Violasaun Bazea ba Jéneru, nune’e bele dezenvolve kompriensaun ida kona-ba esperiénsia pozitivu no negativu iha sistema justisa, obstákulu ba asesu no iha fatin ne’ebé bele hadi’ak.

Diretor JSMP fahe relatoriu iha lansamenntu relatoriu survei konaba utilisador no fornesedor sira iha servisu sistema formal nian iha salaun suai room Timor Plaza dili kinta 23 novembru 2023.Foto Tatoli/Antonio daciparu

JSMP lansa rezultadu peskiza ne’e kona-ba atendimentu ba kazu VBJ, nune’e buat di’ak sira presiza mantein no buat balun presiza hadi’a.

Tanba relatóriu hatudu 21% husi arguidu la komprende linguajén téknika husi Tribunál, 26% husi vítima no arguidu hateten kustu viajen aas liu no 18% la kontente ho atendimentu husi advogadu no defensór sira.

Iha relatóriu peskiza ne’e, Diretora JSMP ne’e dehan atu enkoraja no rekomenda ba instituisaun relevante sira hanesan Ministériu Justisa, Tribunál, Ministériu Públiku, Defensoria Públiku, Advogadu Privadu sira no Polísia tenke kontinua adota sasukat pozitivu sira hodi garante katak sistema judisiál tomak bele responde efetivamente ba kazu sira VBJ inklui vítima sira-nia nesesidade espesífika no hadi’ak tribunál nia efisiénsia hodi administra justisa.

Tanba ne’e, entidade relevante sira tenke foti asaun tuir rekomendasaun espesífika sira ne’ebé mensiona ba entidade ida-idak iha relatóriu ne’e.

JSMP mós rejista kazu VBJ kontinua a’as iha Timor-Leste tanba fó assisténsia legál ba kazu sira hamutuk 115, nune’e judisiál tenke liga ho kazu sira ne’ebé relasiona ho VBJ ne’ebé barak liu asesu ba iha sistema justisa formál.

Iha biban hanesan, Juiz Konselleiru Tribunál Rekursu, Duarte Tilman rekoñese katak julgamentu ba kazu balun han tempu kle’ur loos, utilizadór sira mai hosi fatin do’ok to’o tiha iha Tribunál mak foin hetan informasaun katak fornesidor sira (Juis, prokuradór ka defensór/advogadu) iha ajenda seluk.

Nune’e, Juíz ne’e rekomenda ba estudante sira atubele halo peskiza iha monografia ka iha teze ruma liuliu haree ba iha rekomendasaun sira atu nune’e bele fó atensaun di’ak  hodi justisa no tau iha oin katak justisa hanesan ba ema hotu.

“Ha’u ba tribunál sira atu tau atensaun másimu ba kazu VBJ, tanba kada tinan aumenta ba bei-beik no mós presiza iha kolaborasaun másimu ho entidade sira hotu hodi halo prevensaun ba krime ne’e liuliu iha área rurál sira”, nia afirma.  hateten iha komunikadu ne’ebé Tatoli asesu.

Entretantu, Deputy Resident Representative UNDP, Adeline Carrier, konsidera katak asesu ba justisa nu’udar direitu umanu fundamentál ida hodi ka’er metin nia komprimisu atu hametin setór Justisa iha Timor-Leste liuliu ba grupu vulneravel sira hanesan feto no labarik sira.

“Ami nia esforsu atu serbisu hamutuk ho nia objetivu atu evita ba krime sira ne’ebé akontese hela de’it”, katak nian.

Nia hateten relatóriu husi peskiza ne’e mós subliña nesesidade urjente atu hadi’a efisiénsia asesibilidade iha sistema jurídiku nia laran.

Relatóriu ne’e, nia dehan ezije Governu Timor-Leste, Ministériu Justisa, Tribunál, Ministériu Públiku, Defensoria Públiku, Advogadu Privadu sira no Polísia atu koletivamente resposta ho efisiénsia no apoiu vítima sira iha sistema judisiáriu nia laran no rekomendasaun detalladu sira iha relatóriu ne’e fornese matadalan ba asaun jurídiku sira atu asegura justisa.

Iha sorin seluk, Prokuradór Nelson de Carvalho nu’udar Adjuntu Prokuradór Jerál Repúblika, ba Asuntu Kontensiozu Estadu, refere violénsia nu’udar problema universál liuliu ba feto no labarik sira no nia forma nu’udar obstákulu bo’ot ida.

“Ita hotu rekoñese katak rekursu umanu hosi setór justisa nian menus ho nune’e maka akontese bei-beik faillansu sira, nune’e JSMP temi daudaun, ita presija kolabora malu didi’ak hodi hato’o fallansu sira ne’e ba Parlamentu Nasionál atu nune’e sira bele halo mudansa ba sistema sira ne’e”, nia refere.

Defensor Públiku Nelson Borges konsidera mós relatóriu ne’e pertinente tebes hodi hadi’ak buat balun hosi sistema justisa formál nian liuliu ba kazu VBJ nian.

“Presiza halo atendimentu didi’ak ba vítima sira liuliu ba labarik feto sira. Ita hotu hatene katak ofisiál justisa limitadu, menus juis sira tanba ne’e maka krime sira ne’e nia prosesu bele to’o tinan rua ou tolu ou bele liu maka foin bolu arguidu no lezadu halo julgamentu. Nune’e ita presiza halo rekomendasaun ba Governu, Parlamentu Nasionál para bele tau atensaun ba sistema sira ne’e para halo mudansa iha futuru”, nia afirma.

Jornalista: Jesuína Xavier

Editór     :  Florencio Miranda Ximenes

iklan
iklan

Leave a Reply

iklan
error: Content is protected !!