Governu apresia reuniaun Ázia no Pasífika ba umanitária entre sivíl no militár
DILI, 05 dezembru 2023 (TATOLI) – Governu liuhosi Vise Primeiru-Ministru, Ministru Koordenadór Asuntu Sosiál, Ministru Deszenvolvimentu Rurál no Habitasaun Komunitária Mariano Assanami Sabino, reprezenta, Primeiru-Ministru, Kay Rala Xanana Gusmão, apresia reuniaun Grupu Konsultativu Rejionál, relasiona ho servisu koordenasaun ba resposta umanitária nian entre sivil no militar iha Ázia no Pasífika.
“Governu Timor-Leste apresia ho reuniaun ida-ne’e hein katak péritu sira bele hamosu planu estratéjiku ne’ebé di’ak liu atu nune’e bainhira mosu dezastre ruma iha rejiaun bele responde”, hatete Assanami iha reuniaun ne’ebé realiza iha Suai Room, Timor-Plaza, ohin.
Iha reuniaun konsultativu ne’e, péritu sira halo koordenasaun hodi hamosu programa ne’ebé di’ak liu, bainhira mosu dezastre ruma bele responde ho lalais.
Partisipa iha reuniaun ne’e mak Ministru Interiór, Sekretáriu Estadu Protesaun Sivil no partisipante hosi nasaun 16 iha Ázia no Pasífika.
Jornalista: Hortencio Sanchez
Editór : Zezito Silva
