MAPPF-MS prepara ba vasina rabies ba komunidade iha fronteira
DILI, 12 dezembru 2023 (TATOLI) – Ministériu Agrikultura Pekuaria Peskas no Floresta (MAPPF) hamutuk ho Ministériu Saúde halo preparasaun atu vasina rabies ba populasaun sira iha zona fronteirisa iha Timor-Leste.
“Ita nafatin preokupa kona-ba moras raiva ida-ne’e, tanba ita haree no rona informasaun ne’ebé hetan husi NTT katak iha kazu ida labarik kiik oan ho idade tinan haat ne’ebé asu tata no mate iha semana kotuk”, Diretora Nasionál Diresaun Veterinaria, MAPPF, Joanita da Costa Bendita João dehan iha Parlamentu Nasionál, ohin.
Nia dehan, nasaun viziñu iha ona kazu ema mate tanba asu tata, tanba ne’e husu ba ema hotu tenke kuidadu aan.
“Situasaun ida-ne’e ha’u labele fó sai ofisialmente tanba moras raiva ne’e la’os ami-nia servisu de’it maibé kompeténsia husi membru Governu sira seluk tanba ne’e tempu badak ami hamutuk ho MS hodi hato’o ba públiku kona-ba saida mak Governu halo no sei kontinua ba oin hodi prevene moras ida-ne’e, hodi virus labele daet mai ita”, nia afirma.
Iha sorin seluk, Diretór Nasionál Prevensaun no Kontrolu Moras iha MS, Florindo Gonzaga, informa ministériu servisu hamutuk ho MAPPF komesa lansa ona vasinasaun ba pesoál ministériu agrikultura sira.
“Ami servisu hamutuk ho Ministériu Agrikultura no Peskas komesa lansa ona vasinasaun ba pesoál ne’ebé mak ho risku, entaun ami konsentra liu etapa dahuluk nian mak ba pesoál agrikultura nian ne’ebé mak iha”, Florindo Gonzaga subliña.
Nia adianta katak ai-moruk vasinasaun sei distribui ba parte saúde no komunidade sira ne’ebé iha risku atu hetan moras rabies, espesialmente hirak ne’ebé iha área fronteira.
Notísia relevante: http://OMS ofisialemente entrega vasina rabies 1000 ba MS
Jornalista : Felicidade Ximenes
Editór : Zezito Silva
