Xefe suku Holsa husu labele redús orsamentu ba setór agrikultura
BOBONARO, 13 novembru 2023 (TATOLI) – Xefe suku Holsa, postu administrativu Maliana, munisípiu Bobonaro, António Santa Cruz, husu ba governu no Parlamentu Nasionál atu labele redús orsamentu ba setór agrikultura ne’ebé Ministériu Agrikultura, Pekuária, Peska no Floresta aprezenta liuhosi proposta Orsamentu Jerál Estadu tinan 2024.
Notísia Relevante:OJE 2024: MAPPF prevee millaun $30.694 prioriza aumenta produsaun iha rai-laran
“Agora daudaun debate hela OJE 2024, ami husu atu labele ko’a no husu husu ministru atu defende, atubele apoia ba komunidade no agrikultura iha Timor laran tomak,” nia informa ba jornalista sira iha Maliana, kuarta ne’e.
Nia husu ida-ne’e tanba orsamentu 2024 ba setór agrikultura montante kiik tebes, tanba ne’e bainhira governu avansa ho orsamentu ne’e labele responde agrikultór sira-nia preokupasaun.
“Ami (lideransa komunitária) haree ne’e la sufisiente, ne’e ami rekomenda sé bele ministériu aumenta tán, hodi aprezenta ba Parlamentu atubele deside tuir preokupasaun komunidade nian, tanba agrikultór ne’e setó produtivu, sé lae ita nafatin depende de’it ba importasaun hosi rai-li’ur,” nia katak.
Líder komunitária ne’e mos rekomenda ba governu atu tau prioridade no fó orsamentu boot ba Ministériu Edukasaun no Saúde inklui mós Ministériu Interiór.
“Ha’u haree ministériu ne’e produtivu, tanba nia iha relasaun ho komunidade, maibé la haluha husu atu tau mos prioridade ba seguransa nian, F-FDTL no PNTL tanba sira ne’e fó hela sira-nia servisu no fó hela sira nia-aan atu asegura no fó seguransa ba ita-nia nasaun,” nia fó hanoin.
Agustinho Moisés Perreira, nu’udar agrikultór, informa, governu presiza tau prioridade ba agrikultura tanba konsidera hansan setór produtivu.
“Fó osan boot ba agrikutór hodi osan ne’e mak ita bele hadi’ak irrigasaun, hodi aumenta produsaun rai laran, tanba ami durante ne’e badinas halo natar, maibé bee laiha oinsá mak ita bele hasa’e produsaun,” nia hatutan.
“Maliana ne’e natar luan, agora abandona hotu, bee laiha, tanba irrigasaun Maliana II Memo aat totál, agora fó Ministériu Agrikultura osan ki’ik ne’e, irrigasaun Maliana II dehan atu halo tinan oin ne’e jadi ka lae,” nia preokupa.
Enkuantu Ministériu Agrikultura, Pekuária, Peska no Floresta (MAPPF) prevee millaun $30-resin ($30.694.052) iha proposta-lei Orsamentu Jerál Estadu (OJE) 2024 hodi fó prioridade ba programa aumenta produsaun iha rai-laran.
Notisia relevante: MAPPF sei hola tratór bo’ot hamutuk 25
Jornalista: Sérgio da Cruz
Editór: Evaristo Soares Martins
