PNTL Bobonaro halo apreensaun bís ualu
BOBONARO, 14 dezembru 2023 (TATOLI) – Komandu Polísia Nasionál Timor-Leste (PNTL) Munisípiu Bobonaro, Seksaun Tránzitu, kinta ne’e halo apreensaun ba bís unidade ualu ne’ebé tula pasajeiru hosi diresaun Dili ba Maliana halo viajen iha tempu kalan boot.
Alende ne’e Polisía Tranzitu mós halo apreensaun motorizada unidade 24 ne’ebé kontra lei kódigu estrada.
Enkuantu transporte públiku hirak-ne’e hetan apreensaun iha tuku 15:00 madrugada ne’e liuhosi atividade pasa-revista iha área ponte Nunura diresaun ba Maliana Vila.
Komandante PNTL Munisípiu Bobonaro, Superintendente Xefe António de Sá, informa bís ualu ne’e halo apreensaun tanba la obedese ba regra no orden ne’ebé fó-sai ona kona-bá bandu sirkulasaun tula pasajeiru iha tempu loron.
Notísia relevante: Kontinua viajen kalan,DTT sei hasai lisensa bís Dili-Maliana
“Ita prende bís ualu, ita halo auto stop ne’e, tanba informasaun tama mai komandu barak, liga ba sirkulasaun bís iha kalan, vítima sira halo keixa hahalok balu ladún di’ak, durante tula pasajeiru iha kalan, entaun ita la autoriza, entaun intensaun ita halo cek point hodi fó hanoin ba sira, karik tula pasajeiru sir- ne’e ita-nia-ema, ita tenke ho responsablidade, tanba ita tula ema tenke to’o nia diresaun no asegura seguransa,” nia ko’alia iha Maliana, kinta ne’e.
Hafoin halo apreensaun parte tránzitu mós halo edukasaun sívika ba motorista sira atu obedese ba regra hodi halo viajen iha tempu loron.
Enkuantu autoridade tránzitu halo intervensaun ne’e hodi evita akontese asidente tráfegu inklui akontesimentu sira seluk ne’ebé bele fó ameasa ba ema-nia vida, razaun tanba viajen kalan la garante seguru ba pasajeiru sira liuliu feto.
“Ita fó hanoin ba sira hodi evita halo sirkulasaun kalan, ne’e la’ós ba de’it pasajeiru sira, maibé salva guarda seguransa motorista nian, ita evita tanba sirkula iha kalan ne’e dalaruma ema tuda bís, entaun di’akliu la’o loron, ita evita di’akliu duké akontese tiha mak ita fó sala malu,” nia dehan.
Nia esplika, objetivu seluk hosi atividade auto stop ne’e atu kontrola sirkulasaun sasán kontra bandu sira inklui arma branka, liuliu urjente ne’e kondús motorizada ho karreta laiha karta kondisaun no dokumentu lisensa.
“Ida-ne’e servisu rútina komandu PNTL nian, ita kontinua hala’o, atu antesipa, prevene Natál tinan foun atubele la’o ho di’ak, ita kontinua identifika volume operasaun iha terrenu, atubele prevene, tanba ikus ikus asidente iha munisípiu Bobonaro mós barak,” nia dehan.
Notisia relevante: PNTL husu públiku keixa bís Dili-Maliana ne’ebé viajen kalan
Jornalista: Sérgio da Cruz
Editór: Evaristo Soares Martins
