iklan

BOBONARO, HEADLINE, MUNISÍPIU, SEGURANSA

Kontinua Viajen kalan,DTT sei hasai lisensa bís Dili-Maliana

Kontinua Viajen kalan,DTT sei hasai lisensa bís Dili-Maliana

Polísia Tránzitu munisípiu Bobonaro halo apreensaun ba bís Bís diresaun Dili-Maliana tanba kontra rega roduviária. Imajen Tatoli/Sérgio da Cruz.

BOBONARO, 14 dezembru 2023 (TATOLI) – Diresaun Transporte Terrestre (DTT) Munisípiu Bobonaro, sei aplika sansaun hodi hasai lisensa operasionál tranporte públiku ba bís diresaun Dili ba Maliana bainhira kontinua tula pasajeiru sira halo viajen iha tempu kalan, tanba konsidera motorista sira la obedese ba regra no orden ne’ebé autoridade fó-sai.

Diretór Transporte Terrestre Munisípiu Bobonaro, José Paulo Henriques Baptista, informa, molok hola medids ne’e, sei hato’o karta koordenasaun ba Polisía Nasionál Timor-Leste munisípiu Dili hodi reforsa pedidu anteriór, atubele orienta membru polísia sira halo patrullamentu ba kontrola bís ne’ebé kontinua tula pasajeiru iha tempu kalan.

José Paulo Henriques, informa, iha tinan kotuk DTT no Seksaun Tránzitu komandu polisía munisípiu Bobonaro bolu ona atensaun ba motorista sira atu halo movimentu tula pasajeiru sai hosi Dili iha tempu loron, maibé realidade kondutór biskota hirak-ne’e kontra regra no orden autoridade seguransa nia hodi kontinua halo viajen kalan.

Notísia relevante: PNTL sei hapara bís Dili-Maliana tula pasajeiru iha tempu kalan

“Ita bazea ba lei kódigu estrada no dekretu leí númeru 2/2003, kona-bá sistema transporte, pasajeiru koletivu, ne’e mak atu regula movimentu transporte públiku iha territóriu laran tomak, ne’ebé sira lakohi kumprimenta ba regra ne’ebé mak iha, ita bele hasai sira-nia lisensa transporte, inklui lisensa kondisaun ba motorista rasik, tuir prosesu legál ita bele dehan iha efek jerál, tanba sira beibeik ona, ita-ko’alia, aprosima, maibé nafatin la kumpre regra,” Nia informa ba jornalista sira iha Maliana, kuarta ne’e.

Diretór ne’e argumenta, kestaun atu hapara viajen bís Dili ba Maliana iha tempu kalan, ne’e aprezenta no halo diskusaun iha enkontru konsellu koordenasaun munisipál Bobonaro tinan kotuk bazea ba preokupasaun pasajeiru sira ne’ebé levanta ba autoridade relevante.

Enkuantu autoridade kompetente sira foti kestaun ne’e hodi evita akontese asidente tráfegu inklui akontesimentu sira seluk ne’ebé bele fó ameasa ba ema-nia vida.

“Ita-nia lei la limita la’o kalan, maibé buat haat mak sei la garante hosi la’o kalan ne’e, hanesan seguransa, Segura (seguru), konfortável no ezatidaun, tanba la’o kalan ne’e bele hamosu risku, ema sira uma dook hosi dalan boot mak sira hatún iha tempu kalan, sé nia feto senté la seguru, tanba mesak, entaun pasiénsia hein to’o loron mak fila ba uma, ida-ne’e la seguru,” nia fundamenta.

Maibé Diretor José Henriques rekoñese, problema ne’e akontese tanba seidauk iha estasionamentu ka terminál própriu ba tranporte públiku, liuliu bís, entaun defisil atu kontrola no organiza sira-nia movimentasaun.

Tuir dadus ne’ebé Diresaun Transporte Terrestre Munisípiu Bobonaro rejista hahú hosi 2020 to’o 2021 ne’e , auto carro ne’ebé halo operasaun hosi diresaun Dili-Maliana hamutuk 32. Hosi númeru ne’e 28 mak sei ativu hela.

Notísia relevante: PNTL Bobonaro halo apreensaun ba Bís neen

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!