Top

PNTL sei hapara bís Dili-Maliana tula pasajeiru iha tempu kalan

Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 19 outubru 2022(TATOLI) – Komandante Polísia Nasionál Timor-Leste (PNTL), munisípiu Bobonaro, Superintendente Antoninho Mauluta, hateten iha tempu badak polísia sei hapara bís diresaun Dili-Maliana ne’ebé tula pasajeiru viajen iha tempu kalan.

Nia dehan, planu atu halo apreensaun ba bís hirak-ne’e bazea ba pedidu hosi Diresaun Transporte Terrestre Munisípiu Bobonaro hodi evita asidente tr’afegu inklui akontesimentu sira seluk ne’ebé bele fó ameasa ba ema-nia vida.

Notísia relevante: PNTL Bobonaro preparadu asegura komemorasaun Balibo Five

“Ami atu aprezenta karta ida-ne’e no husu mós ba komandu jerál, liuliu distritu Dili, atu koordena ho DNTT oinsá atu hapara viajen bís mai hosi Dili labele la’o kalan, agora ita haruka karta ba tiha ona komandu Jerál,” Mauluta informa ba jornalista sira, iha Maliana, kinta ne’e.

Superintendente ne’e sempre halo kontaktu ho Komandante PNTL munisípiu Dili, Superintendente Xefe Henríque da Costa, katak daudaun ne’e bís hosi Dili kontinua viajen kalan mai Maliana.

“Sira sai iha-ne’ebá ne’e tuku 01;00 madrugada, dalaruma tuku haat bís tama tiha ona iha Maliana. Ida-ne’e mak ita husu komandu munisípiu Dili, koordena ho DNTT oinsá bís mai Maliana labele halo viajen kalan, maizumenus sai hosi Dili tuku neen dadeer nune’e ita bele kontrola,” nia hateten.

Komandante ne’e dehan, polísia halo intervensaun ne’e atu kuidadu ema-nia vida, tanba akontese bís diresaun Dili ba Viquque, viajen kalan ajudante motorista ida matan dukur toba iha kapón leten monu tún iha kareta leten mate iha parte Akanunu, Hera nian, maibé kondutór kontinua viajen ba to’o Viquque mak polísia foin halo apreensaun.

Situasaun hanesan akontese mós iha Maubara, munisípiu Liquiça, bís halai kalan boot, kondutór matan-dukur deskansa oituan, depois tanba rai-malirin nia ajudante mós tún ba toba fali iha karreta okos, hafoin ida-ne’e bís ne’e arranka fali ba oin sama mate tiha ajudante ne’e.

“Ida-ne’e mak ita atu prevene hotu, ita tetu no lori ba halo koordenasaun ba malu atu asidente tráfegu ne’e labele akontese tán,” Mauluta afirma.

Komandante PNTL munisípiu Bobonaro ne’e mos apela ba kondutór sira atu kumpre regra ka dekretu-lei kódigu estrada, bainhira tula pasajeiru, karik tenke tuir karreta nia kapasidade, liuliu iha tempu finadu tanba iha momentu ne’e mobilizasaun hodi Dili mai Maliana mala’as nune’e labele hetan asidente.

Notísia relevante: PNTL Bobonaro halo apreensaun ba Bís neen

Jornalista   : Sérgio da Cruz

Editór         : Evaristo Soares Martins

Publisidade

Leave a Reply

Latest Post

error: Content is protected !!