BOBONARO, 23 marsu 2022 (TATOLI) – Komandu Polísia Nasionál Timor-Leste (PNTL) Munisípiu Bobonaro, liuhosi seksaun tránzitu, kuarta ne’e halo apreensaun ba Bís neen tanba kontra Dekretu-Lei númeru 6/2003, 6 abríl kona-ba Kógidu Estrada.
Komandante Seksaun Tránzitu Munisípiu Bobonaro, Primeiru Sajentu Mateus Siri-Loe, hateten, ekipa tránzitu halo apreensaun ba transporte hirak-ne’e liuhosi atividade kontrola movimentu iha estrada públiku diresaun suku Holsa, postu administrativu Maliana Vila ba fatin estasionamentu Tunubibi, suku Tapo-memo.
“Durante ne’e regra iha ona katak Bís sira tula no hatún pasajeiru tenke iha terminál Tunubibi, maibé ami simu keixa hosi motorista mikrolete sira katak sira hetan pasajeiru tanba bís tula mai hatún liu iha Maliana Vila, entaun ohin tuku 06:00, ha’u ho ekipa ba halo auto stop halo apreensaun ho totál bís hamutuk neen tanba sira kontra ona artigu 13 (Dekretu-Lei númeru 6/2003, 6 abríl) tula no hatún pasajeiru la tuir regra,” nia informa ba Agência TATOLI iha Maliana, kuarta ne’e.
Nia esplika, infratór sira ba selu koima iha Banku Nasionál Komérsiu Timor-Leste sukurál Maliana, kada Bís ida kona $30 dolar.
Entertantu tuir dadus ne’ebé Diresaun Transporte Terrestre (DTT) munisípiu Bobonaro rejista hahú hosi 2020 ate agora, auto carro ne’ebé halo operasaun diresaun Dili-Maliana hamutuk 32, hosi númeru ne’e 28 mak sei ativu hela tula pasajeiru.
Jornalista : Sérgio da Cruz
Editór : Evaristo Soares Martins
