PNTL Bobonaro sei kontrola prezépiu kada bairru
BOBONARO, 14 dezembru 2023 (TATOLI) – Komandu Polísia Nasionál Timor-Leste (PNTL) Munisípiu Bobonaro, bandu no la permite komunidade liuliu joven feto no mane sira atu organiza malu, toka múzika dansa halo tik tok iha áreadór prezépiu laran, tanba ne’e bele halo ema seluk kestiona valór fiar Kristaun nian no tuir lei ne’e kontra orden públika.
Komandante PNTL Munisípiu Bobonaro, Superintendente Xefe António de Sá, argumenta, objetivu hari prezépiu iha fatin-fatin atu sarani sira adora no demostra idak-idak nia devosaun ba Jesús hodi komemora loron Natál ne’ebé kada tinan selebra iha loron 25 dezembru.
Notísia relevante: PM Xanana husu juventude hola parte iha kompetisaun harii prezépiu natál
“Ita utiliza sala, lei igreja no ita-nia lei bandu, tanba prezépiu ne’e halo ita atu komemora loron Jesús Kristu nia moris, labele ema mak ba fali iha laran hodi toka múzika, depois halo tik tok, hemu lanu, buat sira ne’e hotu ita la permite, entaun Polísia nafatin kontrola. Ita tenke demostra nu’udar ema sarani ho valór, saida mak Maromak nian ne’e, ita ba ho Maromak, labele halo fali hanesan buat halimar ne’e,” nia ko’alia iha Maliana, kinta ne’e.
Atu evita atu hirak-ne’e akontese, Superintedenti Xefe António de Sá, sei orienta komandante eskuadra no Ofisiál Polísia Suku (OPS) atu hasa’e volume operasaun iha terrenu hodi kontrola sarani no orienta sira kumpre valór Kristaun nian.
Nia husu komunidade sira atu kuda devér morál iha idak-idak nia-aan hodi koloka sasán igreja tuir nia dalan.
“Ita-na amu sira fó-sai iha eventu importante Natál ne’e, tinan-tinan sempre selebra, entaun ne’e sai kustume ita nu’udar fiar relijiaun Katólika nian, ne’ebé ita komunidade liuliu joven sira konsumu alkól fali iha prezépiu laran, ita la tolera ida, tanba ne’e kontra orden públika, buat ida hemu tua ne’e iha uma, la’ós iha estrada públiku no fatin Maromak nian ne’e,” nia katak.
Tuir observasaun Jornalista Agência Tatoli iha terrenu notak katak, abitante lokál sira kapitál Maliana hahú ona organiza malu hari harii prezépiu iha idak-idak nia bairru hodi hasoru selebrasaun Natál tinan 2023 no simu tinan foun 2024 nian.
Notísia relevante: Harii prezépiu Natal tenke ho distánsia metru 10 hosi estrada
Jornalista: Sérgio da Cruz
Editór: Evaristo Soares Martins
