MAPPF husu finalista ETA Moleana apoia dezenvolve setór agrikultura
BOBONARO, 18 dezembru 2023 (TATOLI) – Eskola Tékniku Agríkola (ETA) Moleana no Sentru Treinamentu Agrikultura Pofisionál (CETAP, sigla portugés) Corluli, suku Ritabou, postu administrativu Maliana, munisípiu Bobonaro, segunda ne’e realiza serimónia graduasaun ba finalista na’in-59 tinan letivu 2023 ne’ebé pasa ona iha ezame nasionál.
Ministru Agrikultura, Peska, Pekuária no Floresta (MAPPF), Marcos da Cruz, enkoraja finalista sira atu implementa siénsia ne’ebé hetan hodi apoia Ministériu Agrikutura no to’os na’in sira atu bele dezenvolve setór agrikultura iha rai laran.
Ministru hato’o ida ne’e tanba finalista hirak-ne’e aprende ona sénsia liuhosi teória no prátika loron loron oinsá kuda hare, batar, hakiak animal, hakiak ikan, oinsa halo prosesamentu ba ai-haan animal no seluk tán.
“Imi ne’e ohin gradua balu bele ba kontinua estudu iha universidade, balu bele buka servisu, maibé balu mós tenke ba kria servisu rasik, hau fiar katak ita hotu agrikultór nia-oan, saida mak imi aprende ona, imi fila ba uma, imi aplika imi-nia koñesimentu sira-ne’e, agora imi haree ita-nia rai abandona barak, tanba fasilidade infraestrutura hanesan bee, irrigasaun, tratór laiha, ida tan inan-aman katuas hotu ona, laiha kbiit atu tama natar,” nia dehan.
Nia agradese ba manorin sira ne’ebé kontinua iha komitmentu no votande hodi fahe nafatin siénsia ba estudante sira, maske hasoru difikuldade no limitaasaun oinoin.
“Ema barak ona mak prodús ona hosi fatin ida-ne’e, susesu barak mak imi halo ona, ohin ha’u mai atu sai testemuña ba ida-ne’e,” nia enkoraja.
Diretór ETA Moleana, Longuinhos João, konsidera ohin hanesan tempu atu husik finalista sira ne’e implementa siénsia ne’ebé sira apriende durante tinan tolu.
“Sira apriende ona kona-bá siénsia agrikultura, oinsá halo produsaun alimentár, ortikultura, pekuária, peska, floresta no teknkolojia prosesamentu alimentár, iha teória no prátika loron loron, entaun ita fiar katak sira bele kontribui ba dezenvolvimentu, liuliu dezenvolvimentu iha agrikultura,” Jerente eskola ne’e katak.
Administradór postu administrativu Maliana, Tomás Laco Loe, husu ba estudante sira atu kontribui kapasidade tomak ba dezenvolvimentu Timor-Leste liuliu iha setór agrikultura, tanba setór ne’e sai hanesan setór xave ba prosperiedade povu nian hodi rejiste hasoru kiak no hamlaha.
“Ita-boot sira hanesan jerasaun foun, jerasaun kontinuadór ba rai ida-ne’e, labele hanoin de’it remata eskola, ha’u sai funsionáriu públiku, maibé servisu ida agrikultura ne’e barak tebes, tanba eskola voksionál ne’e eziste forma ema atu kria rasik servisu ba nia aan, bele hakiak animal, bele halo ortikultura no hakiak ikan,” nia enkoraja.
Reprezenta Estudante Finalista CETAP, Filomeno de Deus,agradese ba manorin sira-ne’ebé durante ne’e dedika sira-nia hodi fahe siÉnsia ba sira iha kualkér.
“Ami aprende ona iha agrikultura, ami sente katak ami mós bele halo kompetisaun ho inan-aman sira, tanba ami sente katak buat ne’ebé ami estuda, ami bele aplika iha ami-nia aldeia no suku laran,” nia dehan.
Notísia relevante: CAFI aprova ona projetu irrigasaun Maliana II
Jornalista: Sérgio da Cruz
Editór: Evaristo Soares Martins
