DILI, 27 dezembru 2023 (TATOLI)—Governu liuhosi Ministériu Transporte no Komunikasaun (MTK), planu iha fevereiru 2024,hala’o viajen bá nasaun Fransa hodi haree direta progresu produsaun ba kabu ka fiu submarinu ka fiber optic.
“Fibra Óptika prosesu loloos atu lori liuhosi kosta súl nian mai iha Bebonuk, nune’e prosesu ba konstrusaun daudaun iha faze produsaun kabu (fiu) iha Fransa, Nune’e fevereiru 2024 ekipa tékniku bá Fransa haree kabu ne’ebé sira prodús tuir duni ita-nia esperansa ka lae,” Ministru Manetelu hateten, iha Salaun MTK, Caicoli, Dili, kuarta ne’e.
Notísia relevante :Governu lansa “fiber optic” iha 23 novembru, kabu tama uluk Bebonuk
Bainhira, Governante ne’e dehan ekipa tékniku ba haree produsaun kabu ne’e mak tuir duni ona Governu nia hakarak, bele tama ona faze prosesu aprovizionamentu.
“Maibé antes sasán sira ne’e to’o mai Estadu sei tais halo didi’ak. Tuir kalendáriu maiu 2024 ró ida atu dada fiu primeiru ligasaun ne’e to’o ona ita-nia tasi. Ha’u bele dehan 2025 ita laiha ona problema ho liña internet,” nia afirma.
Polítika dada kabu submariñu hosi Darwin mai Timor-Leste nu’udar prioridade Governu Timor-Leste liuhusi kooperasaun ho Governu Camberra, ne’ebé mai ho objetivu atu eleva kapasidade rede internét iha rai-laran tanba Governu Konstitusionál Daualuk iha programa Governu eletróniku ne’ebé persiza liña internét lais.
Governu prevee millaun $41,588 ba verba Fundu Infraestrutura iha proposta Lei Orsamentu Jerál Estadu OJE 2021 hodi halo akizisaun ba ekipamentu informátiku kabu submarinu (fibra óptika).
Nune’e, iha empreza internasionál na’in-20 mak antes ne’e konkorre ona prosesu aprovizionamentu konkursu públiku internasionál, hodi sosa no instala ekipamentu kabu submarinu.
Rekorde katak Governu Timor-Leste no empreza Alcatel Submarine Network (ASN) asina ona, iha maiu 2022, kontratu ba akizisaun no instalasaun ligasaun dijitál iha Timor-Leste, liuhusi kabu submarinu iha sidade Darwin no Port Hedland iha Commonwealth Austrália nian.
Projetu ne’e konta ho millaun $38,6 no iha durasaun entre 01 jullu 2022 no 31 janeiru 2024.
Notísia relevante:SACOMTEL : Horta lansa kabu “fiber optic” estabiliza rede internet
Jornalista : Arminda Fonseca
Editór : Florencio Miranda Ximenes
