DILI, 20 novembru 2023 (TATOLI) – Prezidente Repúblika, José Ramos Horta, halo lansamentu ba kabu fiber optic. Projetu ne’e responsabiliza hosi empreza SACOMTEL.
“Lansamentu ida-ne’e atu halo ligasaun kabu fiber optic hosi Timor-Leste ba rai liur, durante ne’e empreza SACOMTEL mak realiza projetu ne’e, ida-ne’e mak ohin mai halo lansamentu iha Palásiu Prezidensiál ida-ne’e”, Diretór SACOMTEL Abilio Araujo dehan ba jornalista sira iha Palásiu Prezidensiál, ohin.
Nia sente kontente tanba bele investe hanesan timoroan ho objetivu atu lori nasaun ne’e tama iha mundu dijitál.
“SACOMTEL halo ligasaun kabu fiber optic liuhosi Indonézia tanba ita parseria ho empreza PT Indonézia ou PT-PLN icont+ tanba empreza ne’e nia liga kabu fiber optic ne’e to Singapura, entaun ita-nia baze agora iha Batugade, ita liga ba Indonézia direta ba Singapura”, hatete na’in ba SACOMTEL.
Nia haktuir, Prezidente Repúblika apresia ho investimentu ida-ne’e no konsidera kontribuisaun di’ak ida hosi setór privadu ba nasaun.
SACOMTEL iha ona lisensa no iha planu investimentu ho finanseiru ne’ebé klaru, PT-PLN indonézia sai hanesan parseiru ba SACOMTEL tanba empreza Indonézia ne’e nia kabu fiber kobre Indonézia laran ho kilometru 275.000.
“Parseria ida-ne’e la’os servisu hamutuk ho Timor-Leste, parseria ida-ne’e ita utiliza de’it sira nia kabu hosi Indonézia to’o Singapura maibé iha rai laran buat hotu ita nian 100%”, nia relata.
Nia subliña, prosesu ligasaun kabu fiber optic hosi Indonézia mai Timor-Leste, hahú ona no baze Timor-Leste nian iha Batugade no SACOMTEL rasik halo ona kooperasaun ho operadór Timor Telekom no ba oin sei asina akordu hamutuk ho operadór rua seluk hanesan Telemor no Telkomsel.
Abilio fiar katak bainhira kabu fiber optic ne’e instala hotu ona iha territóriu nasionál mak bele fó ona kualidade internet ba ema hotu iha Timor-Leste tanba daudaun ne’e internet iha Timor-Leste ladún la’o ho di’ak.
Tuir investimentu ne’ebé SACOMTEL halo, konesaun kabel hosi Singapura mai Timor-Leste ho osan hamutuk rihun $800 no prosesu hotu iha Timor-Leste, SACOMTEL bele gasta to’o millaun $1-resin
Jornalista: Hortencio Sanchez
Editór : Zezito Silva
