DILI, 29 dezembru 2023 (TATOLI)– Sidadaun timor oan sira iha Austrália hamutuk ho partisionadór sira ho Fundadora Fundasaun Alola, Kirsty Sword Gusmão simu ho haksolok jogadór Klubu Futeból AD SLB Laulara ne’ebé partisipa iha jogu Timor CUP 2023 iha Melbourne-Austrália.
Kirsty Sword Gusmão konsidera partisipasaun Timor-Leste iha jogu importante hodi hametin amizade Timor oan sira ho jogadór sira hotu ne’ebé partisipa iha jogu refere.
“Ha’u hato’o bem-vindu ida ba jogadór timor-oan sira ne’ebé mai hosi nasaun oin-oin, liu-liu jogadór hosi Timor-Leste. Ha’u espera katak, durante semana rua-ne’e, ita boot sira [jogadór] bele hametin liután amizade ne’ebé iha tiha ona no amizade foun hosi Melbourne no hosi nasaun sira seluk ne’ebé reprezenta iha jogu Timor CUP ne’e”, Kirsty Sword Gusmão hato’o apresiasaun ne’e liuhosi nota ne’ebé Agência Tatoli asesu, sesta ne’e.
Jogu abertura ne’e hala’o iha kampu futebol Valley Park, ABD Stadium-Melbourne, Vitoria-Austrália.
Fundadora Sala Leitura Xanana Gusmão ne’e argumenta katak, eventu ne’e hala’o kada tinan envolve jogadór timor oan mai husi nasaun oin-oin hosi rejiaun ASEAN no Europa ho objetivu atu kria amizade no kooperasaun juventude sira liu hosi desportu futeból.
Espoza Primeiru-Ministru, Xanana Gusmão ne’e husu ba jagadór AD SLB bele hametin sira-nia unidade no kooperasaun ho jogadór timor oan sira mai husi nasaun oin-oin ne’ebé partisipa iha jogu Timor CUP 2023.
Iha biban hanesan, Prezidente Commite Timor Cup-Melbourne, Serafim dos Santos agradese ho partisipasaun Timor-Leste iha jogu ne’e.
“Jogu ne’e hala’o kada tinan no fahe prémiu ba jogadór hosi nasaun oin-oin ho objetivu atu hametin unidade juventude sira nian kontribui ba dezenvolvimentu desportu no hasa’e talentu jogadór sira hodi dezenvolve desportu ba timor-oan sira iha nasaun hotu- hotu ho dame”, Serafim dos Santos akresenta.
Parte seluk, Chris Adams nu’udar Project Officer-East Timor, Iwan Walters, Member of State Government Victoria hamutuk ho Naim Kurt Hume, City Mayor ho lian ida de’it katak timor-oan sira nia amizade no timor-oan sira hosi Inglatera no sira ne’ebé iha Austrália rasik.
Abertura jogu ne’e partisipa másimu hosi klube futebol Timor oan sira husi nasaun oin-oin hodi hatudu sira-nia talentu kompete iha taxa Timor CUP 2023 no konvidadu importante sira hosi Governu Austrália no seluk tan.
Atividade ne’e hahú ho hananu múzika hosi artista timor-oan Maria Vitoria ‘Marvi’, no dansa kultura hosi grupu Timor Furak hodi harame eventu internasionál ne’e.
Notisia relevante: Jogadór AD SLB Laulara na’in-19 desloka ba Austrália hodi partisipa jogu Timor CUP
Jornalista : Antónia Gusmão
Editór : Florencio Miranda Ximenes
