Ai-moruk item ualu stock out iha Bobonaro no menus profisionál saúde
BOBONARO, 09 janeiru 2024 (TATOLI)-Ai-moruk hamutuk item ualu mak ‘stock out’ iha armazein farmasia Servisu Munisipál Saúde Munisípiu Bobonaro no oras menus profisionál saúde tanba kontratu remata dezde fulan-dezembru 2023.
Diretór Servisu Munisipál Saúde Munisípiu Bobonaro, João Cardoso, informa, tuir loloos ai-moruk item 10 mak ‘stock out’, maibé iha semana dahuluk fulan ne’e, Intitutu Nasionál Farmasia Produtu Médiku (INFPM) konsege responde ona item rua.
Notísia relevante: Postu Saúde haat iha Bobonaro taka provizóriu
“Agora daudaun item ualu mak sei nafatin stock out. Ai-moruk hirak-ne’e mesak item importante hotu, tanba kuaze antibiótika, hanesan captopril ba asma, ne’e importante la halimar, sé la hemu captopril, ne’e bele oho sira (vida amesadu),” nia ko’alia iha Maliana, segunda ne’e.
Enkuantu ai-moruk ne’ebé mak stock out mak hanesan; hyoscine tablet, multivitamin syrup, predsione tablet miligramos 20, predsione tablet miligrama 5, azitromicin tablet, netronidazole tablet, captropil tablet no diclofenac tablet.
Nia akresenta, problema refere foin lalais parte Servisu Munisipál Saúde Munisipíu Bobonaro hato’o ona peedidu ba INFPM.
“Ami hein mudah-mudahan semana ida ka rua nia laran estoke hirak-ne’e bele kompleta ona atubele halo distribuisaun ba fasilidade saúde sira,” nia katak.
Xefe Sentru Saúde Komunitária Postu Administrativu Maliana, Anacleto Godinho Caeiro, hateten, dezde fulan dezembru tinan kotuk to’o agora estoke aimoruk sufisiente hela, maski iha ai-moruk esensiál item rua hanesan amoxilin no paracetamol estoke limitadu.
“Horisehik ami halo pedidu ba servsiu saúde munisipál, sira reponde ona, ne’ebé ami-nia estoke ne’e sufisiente hodi atende pasiente loron loron,” nia akresenta.
Responsavél Sentru saúde Komunitária ne’e, dehan, daudaun ne’e prosesu distribuisaun ai-moruk no atendimentu saúde ba pasiente sira iha sentru ne’e rasik inklui postu saúde Saburai ho Nunutana la’o normál hela, maibé labele presta servisu ho másimu tanba menus rekursu umanu.
Nia dehan, problema ne’e akontese ligadu ho desizaun Ministériu Saúde ne’ebé deside iha loron 31 fulan dezembru tinan kotuk, hapara kontratu profisionál saúde iha sentru nee hamutuk na’in-18.
Xefe sentru ne’e konsidera desizaun Ministériu Saúde ne’e fó implikasaun ba atividade atendimentu iha suku hanesan; klínika movél, vizita saúde bá família, SISCA no vasinasaun rútina.
“Loron loron ne’e ami servisu araska, pasiente sira mai loron loron, atendimentu ne’e dalaruma hahú tuku 08:00 to’o tuku 12:00, maibé agora to’o tuku 13:00 hanesan mak foin para, signifika katak ema mai barak, maibé pesoál saúde ne’ebé atu fó atendimentu ne’e menus loos,” nia preokupa.
Tuir dadus sentru saúde ne’e rekursu umanu hamutuk na’in-30 resin, maibé na’in-13 hosi Programa Saúde na Família (SNF) vasinatór no na’in-lima hosi parte programa nutrisaun, malária tuberkuloze (TBC) no motorista mak termina ona kontratu, hela deit na’in-18 mak sei ativu servisu.
Notísia relevante: Ai-moruk item rua stoke out iha saúde Bobonaro
Jornalista: Sérgio da Cruz
Editór: Evaristo Soares Martins
