Voluntáriu dezde 2012 no Governu hapara kontratu iha 2023 nia rohan
BOBONARO, 15 janeiru 2024 (TATOLI)- Agremízia Trindade nu’udar profesora kontratadu, ne’ebé voluntáriu dezde 2012, maibé Governu hapara kontratu iha loron 31 dezembru tinan 2023 liubá.
Nune’e, Agremízia Trindade Fátima, nu’udar profesora kontratadu, deside kontinua bá beibeik iha eskola, tanba seidauk asesa despaxu ka notifikasaun formál ruma hosi Ministériu Edukasaun.
“Ha’u hein despaxu tún, halo nusá mak ami haree, maibé ha’u la satisfaz ho desizaun Ministra Edukasaun, tanba ami ne’e loloos estatutu profesór tiha ona, ami kontratu hotu tiha ona, sim, maibé iha lei balu dehan ami-nia estatutu ne’e profesór tiha ona, depois ami asina ne’e mós liuhosi prosesu ami voluntáriu kleur tiha ona, ami hatama vaga, hodi asina kontratu iha abríl 2023,” nia katak.
Biban ne’e, Agremízia husu ba Ministra Edukasaun, Dulce de Jesus, atu foti desizaun ne’ebé justu no rezolve sira-nia estatutu.
“Ha’u, voluntáriu dezde 2012 to’o 2023 mak foin asina kontratu, ne’ebé atu foti desizaun ne’e haree, tanba profesór ne’e iha fatin, fatin menus hotu, sé bele resolve halo didi’ak, karik profesór la to’o, aumenta tán deit, la’ós hapara fali, se ami-nia ne’e mak la rezolve, ami prontu hamriik nafatin iha-ne’e no ami sei la fó fatin ba ema seluk atu mai hanorin,” nia afirma.
Koordenadór Eskola EBF Manu-Aman, Leonardo da Silva, esplika, estudante sala aula tolu labele tuir prosesu ensinu no aprendizajen ho normál, tanba manorin sira-ne’ebé ME deside la renova kontratu ne’e maioria profesór turma.
Nia dehan, profesór ne’ebé para hamutuk na’in-tolu no sira-ne’e mak durante ne’e responsabiliza ba estudante segundu-anu, terseiru-anu no kuartu-anu.
“Sira na’in-tolu ne’e profesór da turma hotu, entaun liga ho desizaun ministériu foti katak sira-ne’e hotu ona iha 31 dezembru, ba oin sira laiha relasaun ho edukasaun, entaun sira labele mai hanorin, entaun ninia problema mak ne’e, ami-nia ne’e na’in-tolu, kaer hotu profesór da turma, sira la tama hotu, entaun problema ba ami-nia eskola, ema laiha atu hanorin, aula tolu mak mamuk,” nia informa bá Tatoli, iha Nunura, Maliana, segunda ne’e.
Relasiona ho problema falta profesór ne’e, Jerente eskola ne’e dehan, hahú ohin ba oin obrigatóriu tenke orienta estudante sira halo de’it limpeza jerál iha áreadór eskola, hafoin remata, oras to’o fila ba uma.
“Agora ne’e hau atu fahe profesór mós lato’o, ne’ebé agora aula sira la’o hela mak sira primeiru-anu, kintu no sestu-anu, seluk ne’e labele la’o, hau hanesan koordenadór bele ajuda, maibé ha’u aguenta ida deit, sala tolu mamuk,” nia esklarese.
Estudante sira hamutuk sala aula tolu iha Eskola Ensinu Báziku Filiál (EBF) Manu-Aman, suku Tapo-Memo, postu administrativu Maliana, munisípiu Bobonaro, hahú abandona hosi profesór sira tanba manorin hirak-ne’e termina ona kontratu servisu ho Ministeriu Edukasaun iha loron 31 fulan dezembru 2023 liubá.
Enkuantu tuir observasaun Tatoli iha terrenu nota katak, hahú hosi dadeer tuku 08.00 to’o meudia, estudante hosi aula tolu ne’ebé profesór laiha, sai hotu ba halimar bola no duni malu iha li’ur no balu kuru bee hamoos sira-nia eskola laran.
Tuir dadus tinan letivu 2024 nian, katak estudante iha eskola ne’e hamutuk 120 mai hosi primeiru siklu no segundu siklu.
Notísia relevante: Profesór 176 iha Bobonaro termina kontratu ho Ministériu Edukasaun
Jornalista: Sérgio da Cruz
Editór: Evaristo Soares Martins
