Profesór na’in-rua iha EBF Anahun hanorin multi-klase

BOBONARO, 16 janeiru 2023 (TATOLI)-Eskola Ensinu Báziku Filiál (EBF) Anahun, suku Odomau, postu administrativu Maliana, munisípiu Bobonaro, durante ne’e enfrenta hela problema menus profesór, nune’e kada loron manorin na’in-rua obrigatóriu tenke hanorin estudante sira ho multi-klase.

Koordenadór eskola EBF Anahun, Celino dos Santos, informa, situasaun ne’e difikulta prosesu ensinu no aprendizajen kada loron tanba estudante klase rua akumula iha aula ida de’it.

Notísia relevante: Profesór 176 iha Bobonaro termina kontratu ho Ministériu Edukasaun

“Eskola ne’e primeiru siklu no segundu siklu, iha deit profesór na’in-rua, ida koordenadór no professor na’in-ida, entaun difikulta labarik sira-nia aprendizajen, tanba profesór tenke halo movimentu ba mai, tenke ser multi-klase, profesór ida tenke tau hamutuk klase 1 ho 2, depois klase 3 ho 4 tau hamutuk, profesór na’in-ida hanorin klase rua,” nia informa bá Tatoli iha Odomau, tersa ne’e.

Tuir nia, situasaun ne’e difikulta tebes atu kontrola estudante sira-nia konsentrasaun no akompañamentu ho didi’ak no susar tebes atu fahe matéria ba estudante sira tuir oras letiva.

Jerente eskola ne’e argumenta, tuir regra loloos kada matéria, manorin ida tenke hanorin ho durasaun menutu 50, maibé ho métode hanorin multi-klase ne’ebé sira aplika obrigatóriu sira tenke  fahe klase ida hetan matéria ho durasaun menutu 25 de’it.

“Ida-ne’e konforme profesór da turma jere, oinsá atubele hanorin, ezemplu oras hanesan ita hanorin klase ida-ne’e, depois hanorin fali ida, ita fó konteúdu mak diferente, ha’u hanoin ida-ne’e di’ak, maibé la sufisiente, labarik balu hantene, maibé barak mak lahatene, difisíl tebes sira atu aprende, tanba profesór tenke halai ba-mai oras la to’o ba sira, labarik sira mós halimar vontade,” Koordenadór ne’e katak.

Alende problema menus profesór, EBF ne’e mós enfrenta hela problema menus materia ditátika no kondisaun infraestrutura eskolár ladi’ak.

Celino haktuir, eskola refere konstrui iha tinan 2009 ho totál sala aula rua, maibé daudaun ne’e kondisaun infraestrututa kuaze aat hotu.

“Kalen, plafon mós komesa ku’ak, udan turuk, anin mós tama, udan mai bee tama to’o sala laran, tempu udan ami labele hanorin ho di’ak, depois nia sumenti sira iha aula laran mos nakfera hotu ona,” nia informa.

Problema hirak-ne’e, nia hato’o beibeik ba Diresaun Servisu Munisipál Edukasaun Munisípiu Bobonaro hodi relata ba Ministériu Edukasaun, maibé to’o agora seidauk tau iha konsiderasaun.

“Hua rekomenda ba parte kompetente, oinsá atu rekruta tán profesór ka bele koloka profesór sira hosi eskola seluk mai reforsa ami, hodi fasilita hanorin matéria ba ita-nia oan sira ho oras ne’ebé kompletu, atubele aproveita matéria,” Celino rekomenda.

Tuir observasaun Jornalista Agência Tatoli iha terrenu nota katak, estudante barak la prezente iha aula-laran, tanba kondisaun klima udan ho anin la fó biban no estudante sira-ne’e barak mak hela dook kuaze distánsia kilómetru ida hosi eskola.

Enkuantu totál estudante primeiru no segundu siklu ne’e tuir aprendizajen iha eskola ne’e hamutuk 47 mai hosi aldeia Galusapupu, suku Lahomea no aldeia Anahun, suku Odomau, postu administrativu Maliana.

Jornalista: Sérgio da Cruz

Editór: Evaristo Soares Martins