iklan

BAUCAU, HEADLINE, MUNISÍPIU, SAÚDE

HorEX Baucau rejeita pasiente na’in-11 mate iha loron ida

HorEX Baucau rejeita pasiente na’in-11 mate iha loron ida

Ospitál Rejionál Eduardo Ximenes (HoREX, sigla portugés) munisípiu Baucau. Imajen TATOLI/Natalino Belo.

BAUCAU, 17 janeiru 2024 (TATOLI) – Ospitál Rejionál Eduardo Ximenes (HorEX, sigla portugés) rejeita informasaun pasiente na’in-11 mate iha loron-ida.

Diretór Ezekutivu HorEX, Evangelino Roque Soares, esplika, informasaun refere halo lideransa no komunidade sira preokupa, maske hosi kedas inísiu ospitál refere harii seidauk akontese situasaun hanesan virál iha rede sosiál.

“Ha’u atu hatete loloos katak informasaun iha rede sosiál ne’e falsu,” Diretór HorEX Baucau hateten iha Vila Nova, kuarta ne’e.

HorEX Baucau liuhosi klasifikasaun informasaun refere husu atu individu ka grupu sira labele politiza tán iha públiku tanba realidade hahú hosi inísiu tinan 2024 to’o loron 16 janeiru pasiente mate duni maibé la’ós loron ida mate na’in-11.

Evangelino Soares rekoñese ai-moruk iha stoke out maibé parte Ministeriu Saúde hamutuk ho SAMES.IP sei esforsu hela atu rezolve iha tempu besik.

HorEX Baucau rekoñese ema mate duni na’in-11, maibé la’ós loron ida, maibé sura hosi inísiu janeiru to’o loron 16 ne’ebé maioria pasiente halo atendementu tarde relasiona kondisaun grave ona antes hosi uma.

“Problema mate tanba grave ona hosi uma tanba ne’e labele politiza saúde tanba relasiona ho ema-nia vida,” Evangelino Soares akresenta.

Hosi na’in-11 komposta hosi na’in-lima kauza kanker haat, na’in-tolu kauza hosi moras hepatitis no na’in-tolu kauza hosi infeksaun raan iha kakutak ne’ebé maioria idade idozu.

Evangelino Soares husu komunidade sira labele ta’uk halo atendementu saúde iha ospitál, maske atuál ai-moruk stoke out inklui pesóal saúde na’in-sia kontratu hapara tanba kontratadu hosi fundu Covid.

Iha parte seluk, ai-moruk hamutuk item 37 stoke out iha HorEX munisípiu Baucau.

Diretór Ezekutivu Ospitál Rejionál Eduardo Ximenes, Evangelino Roque Soares, esplika, hosi totál númeru refere korresponde ba pursentu 8 maibé ai-moruk baze hodi halo atendimentu ba komunidade sei sufisiente hela.

“Stoke out depende ba nesesidade uza aimoruk, ezemplu ba fuan nian bainhira hotu ita halo pedidu iha SAMES laiha,” nia katak.

Parte HorEX informa ona ba Ministériu Saúde (MS) liuhosi inkontru formál maibé prosesu importansaun ai-moruk mak tarde tanba relasiona burokrasia ne’ebé responsável hosi SAMES.IP.

Maske nune’e, prosesu atendementu saúde iha HorEX Baucau kontinua la’o normal liuhosi mekanismu subtitusaun ai-moruk ne’ebé jere hosi profesionál saúde sira.

Ai-moruk item 37 ne’ebé stoke out komposta hosi analgesik, tramadol, kanula, NGT ba labarik, ai-moruk ba fuan inklui ekipamentu médiku seluk.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!