BOBONARO, 19 janeiru 2023 (TATOLI) – Xefe suku Lour, postu administrativu Bobonaro, munisípiu Bobonaro, Miguel Lopes Gomes, husu ba Ministériu Saúde (MS) atu halais prosesu rekrutamentu ba profisionál saúde sira atubele reativa hikas atendimentu saúde ba komunidade sira iha baze.
Líder komunitária ne’e argumenta, daudaun ne’e atendimentu saúde iha suku Lour paradu hela, tanba pesoál saúde ne’ebé governu destaka iha fasilidade saúde ne’e kontrata termina ona iha 31 dezembru 2023.
Notisia relevante: Postu Saúde haat iha Bobonaro taka provizóriu
“Ida-ne’e problema ida-ne’ebé mak sériu tebes no nia implikasaun ne’e boot tebes ba ita-nia komunidade, tanba ita-nia pesoál sira-ne’e la mai halo sira-nia funsaun ona, no abandona ona sira-nia fatin servisu. Ho ida-ne’e ha’u hakarak husu ba Ministériu Saúde aselera rekrutamentu hodi nune’e labele fó implikasaun ba atendimentu saúde,” nia informa ba Tatoli iha Bobonaro.
Miguel sujere ba Diresaun Servisu Munisipál Saúde Munisípiu Bobonaro, atu koloka médiku no enfermeiru ruma destaka provizóriu iha suku Lour hodi hein pesoál saúde foun.
Tuir nia, daudaun ne’e komunidade sira liuliu idozus no inan isin-rua sira difisíl tebes atu hakbesik ba fasilidade sira iha Bobonaro vila no postu saúde sira seluk tán.
“Ha’u hanoin situasaun ida daudaun ne’e ita hotu akompaña, klima ida-ne’ebé mak susar tebes atu ita-nia komunidade partisipa ka halo konsulta iha fatin sira-ne’ebé mak fora hosi suku Lour, tanba distánsia dook tebes, estrada ladi’ak, entaun durante ne’e sira la halo tratamentu, sira moras ba moos, iha fatin de’it.”
Tuir dadus suku Lour iha aldeia haat mak hanesan Olo-Olo, Helikei, Galitaz no Tasgolo ho totál populasaun 1,440, komposta hosi feto 725, mane 715 ho totál uma-kain 200 no xefe família 315.
Enkuantu foin lalais ne’e Minista Saúde, Elia dos Reis Amarál, deklara, dadaun ne’e governu halo hela rekurtamentu ne’ebe ninia prosesu to’o ona faze entrevista, hafoin ne’e sei koloka posoál saúde sira ba ospitál referál iha munisípiu sira, servisu sentrál, INFPM no servisu ambulánsia.
Notísia relevante: Postu saúde sira iha Bobonaro menus rekursu umanu no ekipamentu médiku
Jornalista: Sergio da Cruz
Editór: Evaristo Soares Martins
