DILI, 25 janeiru 2024 (TATOLI) – Diretór Kompaña ASET, Agustu da Costa Soares, garante katak projetu reabilitasaun jardin matak iha Timor Lodge nia oin, iha Comoro sei termina iha fin fulan marsu.
“Iha lapangan (kampu) ami-nia serbisu la’o nafatin, kompletamente, sei entrega iha marsu, tanba kontratu ikus nian. Ami esforsu iha janeiru, fevereiru no marsu hodi kontinua obra no hakarak atu entrega ba Governu iha fim fulan marsu”, diretór empreza ASET, hato’o ba Tatoli.
Nia hateten, tuir tékniku empreza relata katak obra atinje ona 65%, tanba ne’e mak sei konklui kontratu restu fulan tolu atu finaliza projetu.
Dezafiu bo’ot ba iha obra Timor Lodge nian, ezekutivu ne’e, iha situasaun rua ka tolu mak sai hanesan impedimentu ba obra ne’e, primeiru fatin komunidade sira hela ne’ebé Governu foin daudauk ba hasai no naruk no luan lubuk ida jardin lato’o ba iha kontratu fulan tolu.
Nia esplika, empreza komesa ona nahe fatuk la’o fatin, hein pinta vazu ai-hun, fatin ba ema ho defisiénsia sira no kuda duut Japaun.
Diretór ne’e mós informa, empreza mós sei monta lampu iluminasaun no fatuk korál tau hamutuk ho kadeira sira sei monta iha ne’ebá.
Enjeñeiru empreza ASET, Inácio Carvalho Caldas, relata, servisu hela 35% de’it ona, tanba obra ba vazu ai-funan atinje ona 100% no nahe fatuk korál iha dalan ne’e mak sei atinje hela 75% no hakoi dada ahi ba jardin mós pronto ona hela de’it nahe hotu fatuk hodi halakan ahi.
“Hein de’it ita chor no ahi-lakan iha jardin teknikumente porsentu hosi pot bunga (vazu ai-funan), nahe fatuk korál no hakohi dada ahi ba rai-okos ne’e mak ita atinje 65%”, Enjeñeiru empreza ASET, Inácio Carvalho Caldas ba Tatoli.
Nia esplika, 35% ne’e atu konklui nahe-fatuk, kuda ai-funan no halakan ahi iha jardin, tanba ne’e mak empreza esforsu aan atu aselera obra sira ne’e.
Jardin iha naruk 240 metru ne’ebé konstrui ho orsamentu hamutuk $ 269.923.
Jornalista: Jesuína Xavier
Editór: Rafael Ximenes de A. Belo
