iklan

EKONOMIA, EDUKASAUN, BOBONARO, HEADLINE, MUNISÍPIU

SEFOPE sei loke kursu área tolu iha Bobonaro

SEFOPE sei loke kursu área tolu iha Bobonaro

Diretór SEFOPE Munisípiu Bobonaro, Luís de Jesús Barreto. Imajen Tatoli/Sérgio da Cruz.

BOBONARO, 26 janeiru 2024 (TATOLI) – Sekretaria Estadu Formasaun Profisional no Empregu (SEFOPE) munisípiu Bobonaro, planeia iha fulan-fevreiru loke kursu área tolu hanesan lian ingléz, portugés no informátika ba foinsae sira-ne’ebé iha inisiativa hakarak partisipa.

Diretór SEFOPE munisípiu Bobonaro, Luís de Jesús Barreto, informa programa refere hetan apoia hosi parseiru USAID ne’ebé sei implementa hosi Intitute Off Business (IOB) Maliana.

Notísia relavante: SEFOPE sei loke formasaun dalen tolu iha Bobonaro

“SEFOPE nasionál mai halo akordu ida ho IOB, fevreiru nia laran implementa ona kursu inglés, portugés no informátika, fatin iha IOB. Formadór na’in-tolu iha ona timoroan nu’udar mós Bobonaro-oan tanba hakarak habelar ema munisípiu Bobonaro nia abilidade,” nia informa ba jornalita sira iha Maliana, sesta ne’e.

Responsável másimu SEFOPE munisípiu Bobonaro ne’e dehan, krusu refere simu ema laiha limitasaun no la haree ba ema-nia nível edukasaun.

Tuir nia, kritéria ba kursu ne’e ema-ne’ebé atu tuir formasaun hahú hosi idade 18 to’o 35 no etapa primeiru selu de’it ba osan administrasaun.

“Ninia montante mak seidauk hatene, la gratuita, ha’u fiar katak nia la to’o iha $15, nune’e administrasaun prepara sira-nia sertifikadu. Sira-nia kursu hahú hosi dadeer no lokraik ho durasaun fulan-haat, katak fulan rua tuir formasaun no fulan rua estájiu iha área ne’e.”

Daudaun ne’e IOB halo hela koordenasaun lideransa komunitária sira oinsá atu taka sai avizu ba iha nível postu administrativu, suku to’o aldeia.

“Sira tenke asesu hotu ba sira-nia hakarak, kona-bá ingles, portugés no informátika ida-ne’e importante ba ita-nia joven sira. Ida-ne’e inisiativa ida agora daudaun ita-nia joven sira aplika hela vaga nnline ba Austrália nian, antes fevereiru nia laran sira hamutuk 4,675 prepara ba teste eskrita, ida ne’e mak loke kursu ne’e atu sira bele aprende,” nia katak.

Enkuantu SEFOPE planeia rekruta tán formadór na’in-lima atu hanorin iha área ospitálaria, eletrónika no seluk tán ho objetivu atu aumenta joven sira-nia abilidade, hodi prepara-aan kompete iha merkadu traballu.

Notísia relavante: SEFOPE Bobonaro suspende programa kapasitasaun ba estudante sira

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!