CAC averigua emisaun Passaporte 16.000 iha faze dahuluk
DILI, 31 janeiru 2024 (TATOLI) – Diretór Investigasaun Komisaun Anti-Korrupasaun (CAC, sigla portugés), José Verdial, dehan CAC halo ona averiguasaun tanba suspeita ihaa iregularidade iha prosesu atendimentu Passaporte rihun 16 iha Diresaun Jerál Servisu Rejistu Notariadu (DGRSN).
Verdial rekorda, iha ona preokupasaun antes katak Passaporte iha 150 mak lakon. Foin daudaun Ministru Justisa Paulo Remedíos katak deskonfia mosu tan irregularidade iha prosesu atendimentu kaderneta Passaporte iha Diresaun Jerál Servisu Rejistu Notariadu, tanba Passaporte hamutuk 16.000 mai iha faze dahuluk hotu lalais de’it.
“Ami rona katak PCIC mós halo ona investigasaun ba kazu ne’e. PCIC halo nia servisu tanba sira mós hanesan orgaun polísia kriminál. CAC mós halo ona averiguasaun ba kazu Passaporte lakon inklui mós ba Passaporte 16.000 ne’ebé foin daudaun mai iha faze dahuluk ne’e”, Verdiál hateten ba jornalista TATOLI iha kna’ar fatin Farol, kuarta ne’e.
José hateten, CAC halo ona enkontru kondenasaun ho BNCTL, atu apoia dadus ba CAC, tanba normalmente pagamentu Passaporte ne’e halo iha BNCTL.
“Ha’u foin enkontru ho sira BNCTL atu husu apoiu ba sira para fornese dadus ruma mai ami relasiona ho pagamentu ba kaderneta Passaporte, tanba kuandu ema trata tiha sira-nia dokumentu iha notariadu sira halo pagamentu iha banku mak hosi notariadu fó Passaporte”, nia adianta.
Tanba ne’e, CAC presiza halo koordenasaun ho parte BNCTL atu haree ida-ne’e hodi konfirma dadus sira atu bele nesesita ba investigasaun kontinu.
“Kuandu iha averiguasaun ne’e mak ita hetan indísiu krime, ita sei halo auto partisipasaun ba Ministériu Públiku. Hein karik MP delega fali kompeténsia mai ita hafoin kontinua halo investigasaun”, nia konklui.
Notísia relevante : Suspeita iha irregularidade emisaun Passaporte rihun 16 iha faze dahuluk
Jornalista: Natalino Costa
Editór : Zezito Silva
