iklan

HEADLINE, INKLUZAUN SOSIÁL

F-FCJ atende ona vítima violénsia hamutuk 142 iha tinan 2023

F-FCJ atende ona vítima violénsia hamutuk 142 iha tinan 2023

Ilustrasaun Violénsia. Imajen/Espesiál

DILI, 31 janeiru 2024 (TATOLI)—Fundasaun-Fórum Komunikasaun Juventude (F-FCJ) Oratóriu Dom Bosco Balide, Centro Miguel Magone, atende ona vítima violénsia hamutuk 142, iha tinan 2023.

“Hahú hosi janeiru to’o dezembru 2024, ita simu kliente ka vítima sira mai uma-mahon hamutuk 142, kompostu hosi feto 122 no mane 20,” Responsável Uma-Mahon F-FCJ, Domingas Pereira, informa ba Agência Tatoli, iha ninia knaar fatin, Balide, kuarta ne’e.

Notísia relevante : Uma-Mahon F-FCJ presiza tranferénsia osan husi MSSI

Vítima hirak ne’e barak maka re-integra ona ba família no hela de’it na’in-16 mak iha hela uma-mahon.

“Janeiru tinan ne’e ita simu na’in-neen, entaun daudaun hela iha uma-mahon hamutuk 22. Vítima sira ne’ebé ita simu ne’e mai ho tipu kazu hanesan violénsia doméstika, violénsia seksuál abuzu seksuál no seluk tan,” nia akresenta.

Uma-mahon F-FCJ simu vítima tuir kritéria, ho tinan 0-18 maibé la taka dalan ba ema ho idade 18 to’o 40.

“Vítima sira ne’ebé iha, durante ne’e sira hetan apoiu hosi Plan Internasional no Governu liuhosi Ministériu Solidaridade Sosiál no Inkluzaun (MSSI). Montante osan ita labele temi maibé atu dehan de’it katak osan ne’ebé ita hetan hosi Governu ne’e atu haree ba vítima sira ne’ebé ita halo dala ruma hasai hotu tanba osan laiha,” Responsável Uma-mahon tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!