Komunidade ezije MOP rezolve estrada urbana Lolotoe
BOBONARO, 01 fevreiru 2024 (TATOLI) – Komunidade sira husu no ezije ba Ministériu Obra Públika (MOP) atu rezolve lalais estrada urbana postu administrativu Lolotoe hahú kedas iha diresaun suku Tapo, tanba daudaun ne’e ninia kondisaun fíziku kuaze aat hotu ona.
Filipe de Jesús Lesu nu’udar abitante, hateten estrada refere konstrui dezde okupasaun Indonézia to’o agora governu seidauk tau prioridade atu hadi’ak.
“Ami-nia estrada ne’e ida mai sukat, ida mai tan sukat tan, loron ba loron udan mai nia aat tiha mós, mai rehabilita de’it to’o ona, ami lahatene bainhira loos mak atu la’o iha estrada di’ak karik, ne’ebé ami husu ba Obra Públika se bele hadia ona ami nia estrada ne’e,” nia informa bá Tatoli, iha Lolotoe vila, tersa ne’e.
Filipe haklaken, tinan-tinan bainhira tempu udan sira labele halo viajen ba Maliana no kapitál Dili.
“Estrada ku’ak no nakfera hotu ona, foin lalais ne’e iha parte Zulo-Il nia ne’e rai halai aat hotu, ema deit liu ladi’ak, agora hadi’a ona, maibé udan semana kotuk ba ne’e nia komesa fera fali ona,” nia dehan.
Xefe suku Lupal, postu administrativu Lolotoe, Gabriel de Jesús, reforsa kondisaun estrada refere difikulta movimentasaun transporte públiku no privada iha tempu udan.
Nia dehan, problema estrada refere lideransa komunitária sesante sira hato’o beibeik pedidu ba nasionál, maibé to’o agora laiha rezultadu.
“Ami-nia estrada ne’e dezde okupasaun to’o agora laiha intervensaun ruma, antes ne’e mai sukat ona, maibé seidauk halo ida, estrada ne’e ita hotu haree nia grave duni,” nia katak.
Tuir dadus 2022 katak postu administrativu Lolotoe iha aldeia 20, suku hitu ho totál populasaun 7,695, kompostu hosi mane 3,813 no feto 3,882 ho totál xefe família 1,591.
Notísia relevante: IX Governu presiza konsidera estrada Bobonaro-Lolotoe iha OJE 2024
Jornalista: Sergio da Cruz
Editór: Evaristo Soares Martins
