Top

Defeza Kalohan no Apolinario sumbete ona rekursu ba Tribunál

Tribunal Distritál Dili

DILI, 04 fevereiru 2024 (TATOLI) – Defeza hosi Arguidu António da Conceição ‘’Kalohan’’,  Advogadu Privadu Pedro Camões no Defeza hosi Apolinario dos Santos, advodagu Marçal Masquerinhas, submete ona rekursu ba Tribunál hodi kontesta desizaun Tribunál Judisiál Primeira Instánsia Dili ne’ebé aplika pena prizaun ba arguidu na’in-rua.

“Sim ha’u hatama ona rekursu iha kinta (1/2) tuku 16:00 loraik. Rekursu ne’e ha’u hatama iha Tribunál Judisiál Primeira Instánsia Díli depois sei submete rekursu ne’e ba Tribunál Rekursu”, Pedro Camões hateten ba jornalista sira iha nia kna’ar fatin Plaza, ohin.

Camões hateten, konteúdu hosi rekursu ne’ebé aprezenta mak la konkorda Tribunál Judisiál Primeira Instánsia Dili ne’ebé aplika pena prizaun efetivu tinan lima ba nia kliente António Kalohan.

Tanba ne’e, Defeza hosi Kalohan hatama rekursu ba Tribunál Rekursu no prazu ba desizaun  rekursu ne’e iha loron 30.

“Rekursu ha’u konkui hotu ona no submete ona ba Tribunál, ita hein desizaun Tribunál Rekursu nian”, nia adianta.

Iha sorin seluk, Defeza Arguidu Apolinario dos Santos, Defesór Públiku, Marçal Masquerinhas, hateten hanesan Defeza hatama ona rekursu ba Tribunál Judisiál Primeira Instánsia Dili.

“Ha’u hatama ona rekursu iha 1 fevereiru, iha dader tuku 9:00”, nia informa.

Nia dehan, konteúdu hosi rekursu mak Defeza hosi arguidu Apolinario konsidera desizaun Tribunál la justu, tanba nia kliente Apolinario ne’e nia la halo prátika krime ba partisipasaun ekonómia no negósiu tanba momentu ne’e nia kliente la hetan benefísiu ruma hosi projetu ne’e.

“Nia (Apolinariu) halo de’it nia servisu hanesan tékniku ne’ebé ajuda ministru momentu ne’ebá, ha’u nia kliente ne’e la hetan benefísiu hosi prosesu sira ne’ebé la’o, desizaun ne’ebé Tribunál foti la justu”, nia afirma.

Rekorda fali katak iha segunda (8/1) Juiz prosesu ne’ebé kaer kazu António Conceição ba projetu eskavasaun masin Atabae, Juiz Ivan Suritai, deside pena efetivu tinan lima ba arguidu  Antigu Ministru MCI António da Conceição ‘’Kalohan’’ ba krime partisipasaun ekonómia no negósiu tanba durante julgamentu faktu sira provadu katak arguidu komete duni krime ne’ebé Ministériu Públiku imputa iha nia akuzasaun.

Arguidu Apolinario dos Santos Tribunál kondena pena efetivu tinan haat ba krime partisipasaun ekonómia no negósiu tanba durante julgamentu faktu sira provadu katak arguidu komete duni krime ne’ebé Ministériu Públiku imputa iha nia akuzasaun.

Arguidu Domingos Goveia nu’udar na’in ba Empreza Hugo Amor Unipessoál Lda ne’ebé hetan fiar hosi Ministru Komérsiu Indústria ba projetu eskavasaun masin fatuk iha Atabae, Tribunál deside hodi absolve arguidu hosi krime administrasaun danoza no aplika pena indeminizasaun ho valór osan $17.000. Tanba konsidera arguidu nia hahalok ne’e hamozu hosi prejuizu ba Estadu  ho valór kuantia $17.000.

Notísia relevante : Tribunál notifika ona Defeza Kalohan, fevereiru submete ona rekursu

Submisaun rekursu Tribunál seidauk notifika Defeza arguidu Kalohan no Apolinário

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!