DILI, 05 janeiru 2024 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, no Embaixadór Malázia iha Timor-Leste, Amarjit Sarjit Singh, aborda kona-ba formasaun ba jornalista timoroan sira, ne’ebé iha oportunidade dahuluk ne’e sei oferese ba jornalista Agência Noticiosa de Timor-Leste Tatoli, Institutu Públiku no Rádiu Televizaun Timor-Leste, Empreza Públika (RTTL, E.P) nune’e rekursu sira iha órgaun komunikasaun sosiál rua ne’e sai profisionál liután.
“Ohin, ko’alia uitoan kona-ba dezenvolvimentu mídia iha Timor-Leste, liuliu kooperasaun entre Timor-Leste no Malázia. Ami na’in-rua ko’alia ona kona-ba kapasitasaun maka’as liután ba jornalista sira hotu iha Timor-Leste, liuliu iha área formasaun nian”, Expedito Dias Ximenes hatete hafoin sorumutu iha Palásiu Governu.
Nia salienta katak Malázia hakarak fó importánsia hodi realiza formasaun atu hasa’e koñesimentu no abilidade jornalista sira-nian iha área jornalizmu iha tinan rua oin mai. Tanba ne’e, oportunidade dahuluk sei loke ba Ajénsia Noticiosa Tatoli, IP no RTTL, E.P atu partisipa iha atividade ne’e.
“Tanba Malázia iha ajénsia notisioza ida naran BERNAMA no iha mós Rádiu Televizaun Malázia. Iha hasoru malu ne’e, parte rua tau ona hanoin hamutuk oinsá atu fó formasaun ba jornalista sira, liuhusi serbisu hamutuk entre Ajénsia Notisioza BERNAMA no Tatoli, I.P nomós Rádiu Televizaun Timor-Leste no Rádiu Televizaun Malázia”, dehan.
“Kooperasaun ne’ebé SECOMS ho Malázia halo daudaun ne’e presiza follow up lalais, tanba ne’e ami-nian tékniku sira sei halo diskusaun lalais liután, nune’e bele prodús tiha nota entendimentu ida, nune’e bele aselera formasaun ba jornalista sira iha Tatoli no RTTL”, informa.
Governante ne’e esplika katak formasaun ida ne’e importante tebes ba jornalista sira iha Tatoli no RTTL, tanba tinan rua tan Timor-Leste sei sai membru ASEAN no presiza loke mós informasaun la’ós iha de’it rai-laran, maibé mós informasaun husi Malázia nian.
Tanba ne’e, SECOMS ho embaixada Malázia iha ona hanoin ida katak bainhira kapasitasaun ba jornalista husi órgaun rua ne’e konklui ona bele tau korrespondente Tatoli nian ida iha Malázia nomós korrespondente BERNAMA nian ida iha Timor-Leste atu povu sira bele akompaña informasaun husi nasaun rua ne’e.
Embaixadór Malázia, Amarjit Sarjit Singh, reforsa katak importante tebes atu realiza formasaun hodi hasa’e koñesimentu jornalista sira iha Timor-Leste, tanba país ne’e atu sai ona membru ASEAN no prezensa Timor-Leste nian iha organizasaun ne’e konta mós ho jornalista timoroan sira-nian.
“Bá oin ne’e ita sei hahú ko’alia ona kona-ba ninia tékniku sira, nune’e ita bele aselera akordu kooperasaun ne’e atu ita bele realiza lalais formasaun ba jornalista sira iha Timor-Leste”, realsa.
Jornalista: Tomé Amado
Editora: Maria Auxiliadora
