Saúde Bobonaro hetan ona apoia kombustível hosi MS
BOBONARO, 15 fevreiru 2024 (TATOLI) – Diresaun Servisu Munisipál Saúde Munisípiu Bobonaro, hetan ona apoia kombustível hosi Ministériu Saúde (MS) hodi fasilita karreta ambulánsia tula pasiente ba fasilidade saúde liuliu ba kazu emerjénsia.
Notísia relevante: Sentru Saúde Balibo laiha estoke kombustível ba Ambulánsia
“Iha loron rua ba kotuk ami kontaktu ona ba Ministériu Saúde, fó ona apoia mai ami ba durasaun fulan ida nian, ami mós nafatin husu ba autoridade munisípiu Bobonaro atu apoia nafatin ba karreta sira multifunsaun no ami halo fumigasaun ba moras dengue ne’ebé oras ne’e daudaun kazu sa’e maka’as,” Diretór Servisu Saúde Munisípiu Bobonaro, Gil Bernardo Vicente, informa ba Jornalista sira iha Maliana, kinta ne’e.
Gil Bernardo mós atualiza maske daudaun ne’e fasilidade saúde balu iha munisípiu Bobonaro laiha rekursu umanu, maibé atendimentu saúde ba komunidade kontinua la’o normál.
“Ha’u orienta ona ba xefe sentru saúde sira atu halo oráriu semana ida tún ba vizita dala-rua ba postu saúde sira, ne’ebé ita garante fasilidade saúde sira sei la mamuk,” nia dehan.
Tuir dadus Munisípiu Bobonaro iha sentru saúde hitu, ospitál referál ida ho nia totál pesoál saúde hamutuk na’in-243 komposta hosi permanenti 214 no kontratadu 29.
Notísia relevante: Servisu Saúde Bobonaro enfrenta problema kombustível
Jornalista: Sérgio da Cruz
Editór: Evaristo Soares Martins
