DILI, 19 fevereiru 2024 (TATOLI)—Embaixadór Itália iha Timor-Leste, Benedetto Latteri, segunda ne’e, hasoru malu ho Sekretáriu Estadu Komunikasaun Sosiál (SEKOMS), Expedito Dias Ximenes, hodi diskute kona-ba dezenvolvimentu informasaun iha Timor-Leste.
“Ohin, ha’u mai hasoru malu ho Sekretáriu Estadu Komunikasaun Sosiál, ami ko’alia kona-ba dezenvolvimentu informasaun iha Timor-Leste no progresu serbisu Rádiu Televizaun Timor-Leste, Empreza Públika (RTTL, E.P) ne’ebé hanoin balun posibilidade atu apoia ekipamentu dijitalizasaun,” Embaixadór Benedetto Latteri hateten, hafoin hasoru malu ho Sekretáriu Estadu, iha Palásiu Governu.
Nune’e, Diplomata ne’e sei hato’o fali ba Governu no empreza iha Itália hodi bele konkretiza planu ne’e.
Notísia relevante : Lansa sistema dijitalizasaun, PM Taur enkoraja RTTL,E.P dezenvolve-an
Iha fatin hanesan, Sekretáriu Estadu Expedito, lori Governu Timor-Leste nia naran hato’o agradese no apresia tebes ba inisiativa tanba bele ajuda liután serbisu RTTL, E.P ba futuru.
“Apoia ekipamentu dijitalizasaun ne’ebé sei fó ba RTTL,E.P ne’e sei oferse hosi empreza privada televizaun nian iha Itália, kona-ba ekipamentu saida no hira, Embaixadór sei bá fali hato’o ba Governu no empreza ne’ebé atu apoiu mak sei haruka fali karta ofisiál mai Sekretaria Estadu Komunikasaun Sosiál no Prezidente RTTL, E.P materiál saida de’it mak presiza mak foin fó apoiu,” Expedito tenik.
Dijitalizasaun RTTL, E.P ne’ebé instala maka Sistema Dijitál Transmisaun Multimedia Terrestre (DTMB, sigla ingés).
Faze dahuluk projetu ne’e seidauk kobre populasaun tomak maibé foin iha munisípiu Dili no Liquiçá, no postu administrativu balun hanesan Cailaco, munisípiu Bobonaro no postu Laulara, munisípiu Aileu.
DTMB sei fó sai transmisaun ho kualidade definisaun a’as (HD – High Definiction) ba telespetadór tanba hanesan teknolojia avansadu iha mundu, ne’ebé di’ak liu kompara ho sistema tradisionál no ba dahuluk aplika kódigu low-density parity-check (LDPC) transmisaun dijitál terrestriál iha mundu.
Totál uma-kain ne’ebé asesu ona sistema dijitál iha faze dahuluk mak iha suku Guiço, Lisadila, Gugleur, Vatuboro no Leotola iha postu administrativu Maubara, munisípiu Liquiçá hamutuk 300, ho totál benefisiáriu 1.864, kompostu hosi mane 940 no feto 924.
Daudaun iha Timor Leste, sentru transmisaun tolu mak funsiona hanesan Biterlau iha Fatuahi, Kutulau iha Bazartete no torre sentrál iha Caicoli, ne’ebé instala ona ekipamentu sofistikadu sira hodi halo transmisaun dijitál, ne’ebé materiál sira hetan apoiu hosi Governu xinez no instala hosi tékniku xinez.
Timor-Leste ninia lokál televizaun analog iha 13, ne’ebé área kobertura kiik no frekuénsia ida bele transmite de’it programa RTTL, E.P nian ida no televizaun sai la moos ka haree hanesan rai-henek iha televizaun laran no nia lian ladún moos, hirak ne’e akontese tanba ekipamentu analog ne’ebé utiliza hela tuan ona, nune’e prejudika ba prosesu manutensaun no monitorizasaun.
Ho hanoin hirak ne’e maka Governu hakarak dijitaliza sistema radiudifuzaun RTTL, E.P tanba sistema analog implika prosesu dezenvolvimentu mídia komunikasaun iha Timor Leste.
Jornalista : Arminda Fonseca
Editora : Julia Chatarina
