iklan

NASIONÁL, HEADLINE, POLÍTIKA

Embaixadór Nebojsa konvida PM Xanana partisipa konferénsia ekonomia azul iha Croásia

Embaixadór Nebojsa konvida PM Xanana partisipa konferénsia ekonomia azul iha Croásia

Primeiru-Ministru, Kay Rala Xanana Gusmão, hala’o enkontru ho Embaixadór Croásia no ASEAN, Nebojsa Koharovic, iha Palásiu Governu, segunda (19/02/2024). Imajen Tatoli/António Daciparu

DILI, 19 fevereiru 2024 (TATOLI)–Primeiru-Ministru (PM), Kay Rala Xanana Gusmão, hala’o enkontru ho Embaixadór Repúblika Croásia ba Indonézia no Asosiasaun Nasaun Sudeste Aziátiku (ASEAN), Nebojsa Koharovic.

Durante hasoru malu, diplomata ne’e konvida Xefe Governu hodi partisipa iha konferénsia kona-ba ekonomia azul, ne’ebé sei realiza iha maiu 2024.

“Aproveita biban konvida mós Primeiru-Ministru atu partisipa iha konferénsia ne’ebé sei realiza iha Croásia. Eventu ne’e sei marka prezensa hosi Xefe Estadu, Xefe Governu no entidade importante seluk,” Embaixadór Nebojsa, hateten hafoin hasoru Xefe Ezekutivu, iha Palásiu Governu, segunda ne’e.

Notísia relevante : Embaixadora Rut Krüger Giverin hasoru PM Xanana

Aleinde ne’e, entidade rua diskute mós kona-ba kooperasaun bilaterál rai rua ba futuru, ne’ebé ho finalidade fó apoia ba dezenvolvimentu Timor-Leste.

“Enkontru ne’e konstrutivu tebes, agradese bele hasoru malu ho Primeiru-Ministru nu’udar líder istóriku ba Timor-Leste nia independénsia. Hanesan ita hotu hatene katak Croásia gosta tebes Timor-Leste hanesan nasaun foun, ami ko’alia liu kona-ba dezenvolvimentu no posibilidade halo kooperasaun espesífiku iha área edukasaun, saúde, indústria, dezenvolvimentu no projetu ekonomia,” nia akresenta.

Nebojsa Koharovic konsidera Timor-Leste hanesan nasaun foun ne’ebé halo esforsu maka’as hodi dezenvolve ekonomia, infrestrutura no rekursu umanu hodi prepara-an sai membru ASEAN, ne’ebé iha tempu hanesan hola parte iha membru Nasaun Komunidade País Lian Portugés (CPLP, sigla portugés), envolve iha grupu g7+ no halo kooperasaun ho nasaun hotu hodi habelar estratejia kooperasaun bilaterál, multilaterál, trilaterál.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!