iklan

NASIONÁL, EDUKASAUN, HEADLINE

Kandidatu professór 12.738 admitidu iha selesaun dokumentus

Kandidatu professór 12.738 admitidu iha selesaun dokumentus

Manorin kontratadu sira kontinua ezije ME atu rekoñese sira-nian direitu hodi hetan avaliasaun dezempeñu.

DILI, 21 fevereiru 2024 (TATOLI)-Diretora Nasionál Rekursu Umanu hosi Ministériu Edukasaun (ME), Anita Tavares de Jesus, relata aplikante hamutuk 12.738 maka admitidu ona ba bolsa kandidatu professór ne’ebé maka submete ona sira-nia dokumentus ba Ministériu Edukasaun foin lalais.

“Totál aplikante hamutuk 13.588 ne’e, ekipa komisaun selesaun ba dokumentu bolsu kandidatu profesór ne’ebé hahú 12 fevereiru to’o 19 fevereiru 2024, nune’e finaliza ona no ninia rezultadu hamutuk 12.738 mak elizivel no la elizivel hamutuk 1.219,” Nia informa ba jornalista sira iha servisu fatin,Villa-Verde Dili, kuarta ne’e.

Notísia Relevante :Ministériu Edukasaun sei rezolve problema manorin sira ho bolsa kandidatu iha 2024

Nia dehan, Komisaun Selesaun dokumentus, iha tempu badak sei públika ona lista naran kandidatu profesór admitidu sira ba públiku hodi hala’o preparasaun tanba tuir data tentativa teste ne’e sei hahú iha loron 13 fulan-marsu 2024.

“Tanba ne’e komisaun tenke taka sai lista lalais hodi aplikante prepara halo rekursu,  karik sira la satisfeitu ho rezultadu no tempu ba halo rekursu ne’e loron lima (5). Nune’e ita taka lista bazeia ba oráriu teste nian no ita iha referénsia sia. Pre-eskolár referénsia ida, primeiru no segundu siklu iha referénsia ida, terseiru siklu iha referénsia hitu,” nia hateten.

Baseia ba despaixu hosi Ministériu Edukasaun nian ne’ebé fó sai ona katak kandidatu sira sei tuir teste ho referénsia hamutuk sia maka hanesan lian tetúm, portugués, matemátika, siénsia sosiál no naturáis, dezenvolvimentu pessoál.

“Ezame ne’e sei hala’o iha Komisaun Funsaun Públika tanba ministériu ne’e halo kooperasaun ho Komisaun Funsaun Públika no tanba sira iha ekipamentu ezame nian, hala’o beibeik ona ho ezame elektrónika,” Diretora hateten.

Kona-ba aplikante 1.219 ne’ebé maka naran la admitidu iha prosesu selesaun dokumentus tanba sira-ninia nivél edukasaun foin remata de’it iha eskola sekundáriu, balun ninia diploma seidauk legaliza, entaun la priense kriteria hosi Komisaun Selesaun dokumentus.

“Iha lista ne’ebé atu taka sai ne’e, ami tau ho nia klasifikasaun razaun la admitidu nune’e sira bele hatene, ita sei la husik mamuk,” nia hatutan.

Entertantu, aplikante ne’ebé elizivel hamutuk 12.738 ne’e hosi Munisípiu Aileu hamutuk aplikante 565 (4,54%), Ainaro 785 (6,31%), Ataúro 94 (0,76%), Baucau 1.349 (10,83%), Bobonaro 872 (6,93%), Covalima 598 (4,82%), Dili 3.528 (85,36%), Ermera 1.326 (10,66%), Lautém 557 (2,44%), Liquiça 598 (4,82%), Manatuto 436 (3,51%), Manufahi 895 (6,87%), Rejiaun Administrativa Espesiál Oé-cusse Ambeno (RAEOA) 345 (2,76%), Viqueuque 797 (6,41%).

Notísia Relevante :Komisaun G iha PN enkoraja timoroan aplika bolsa rekrutamentu ba manorin

Jornalista : Osória Marques

Editór : Agapito dos Santos

iklan
iklan

Leave a Reply

iklan
error: Content is protected !!