Marsu realiza Xanana Cup hodi promove klube futeból iha munisípiu

DILI, 21 fevereiru 2024 (TATOLI)– Prezidente Komisaun Organuzadora ba jogu futeból Xanana Cup, Feliciano P. Ximenes, informa , daudaun komisaun hahú halo inskrisaun ba klube futeból sira iha munisípiu sira atubele realiza jogu iha fulan-marsu.

“Preparasaun agora iha faze inskrisaun ba klube no daudaun iha ona klube 20-resin mak rejistu ona. Tuir  padraun katak kopa ida atu la’o tenke iha klube 32, ami fiar katak ita sei hetan klube 32 tanba klube foun barak mak ami rezerva hela atu troka klube tuan sira karik lakohi kompete,” Feliciano hatete ba Agência TATOLI iha edifisiu Federasaun Futeból Timor-Leste (FFTL) Dili, kuarta ne’e.

Tuir oráriu jogu Xanana Cup sei hala’o durante fulan tolu hahú marsu to’o juñu tinan ne’e. Objetivu Xanana Cup, nia dehan hakarak promove klube sira ne’ebé sai kampionatu iha eventu sira iha Munisípiu.

Alende ne’e, Jogu ne’e mós ho objetivu atu selebra mós lider karismátiku atuál Primeiru Ministru Kay Rala Xanana Gusmão nia aniversáriu ba dala 78 ne’ebé sei selebra iha fulan-juñu tinan ne’e.

Jogu ne’e sei realiza iha kapitál Dili no komisaun buka meiu hela utiliza Estádiu Munisipál Dili no aluga kampu klube Lalenok United nian iha Fatuhada.

Eventu ne’e, nia dehan komisaun husu ona apoiu fundu ba FFTL no Ministériu Juventude Desportu Arte no Kultura (MJDAK), maibé seidauk iha resposta.

Alende ne’e komisaun mós ko’alia ona ho patrosinadór balun atu fó apoiu ba prémiu ba primeiru lugar no terseiru lugar.

“Premiu ba manán na’in hanesan de’it tinan kotuk, maibé ba primeiru lugar mak iha mudansa tanba tuir avo nia tinan, tinan ne’e avo kompleta tinan 78 entaun prémiu primeiru lugar sei hetan $7,800. Segundu lugar $4,000 no terseiru lugar $3,500,” nia esplika.

Notísia relevante:Kalbuady hala’o abertura Tasa Avo Nana iha Covalima

Jornalista: Hortencio Sanchez

Editór      : Florencio Miranda Ximenes