iklan

HEADLINE, SEGURANSA

PNTL detein jerente Farmasia Moris Foun na’in tolu

PNTL detein jerente Farmasia Moris Foun na’in tolu

DILI, 22 fevereiru 2024 (TATOLI)-Komandu Polísia Nasionál Timor-Leste (PNTL), hosi Departamentu Investigasaun Kriminál (DIK) Nasionál detein jerente Farmasia Moris Foun Colmera na’in tolu tanba suspeita hatama ai-moruk ilegál ho totál item 250 mai Timor-Leste (TL)

Iha kinta (22/02) ne’e, oras tuku 9:00 dader DIK Nasionál ezekuta mandadu judisiál hosi Tribunál Judisiál Primeira Instánsia Dili hodi halo detensaun, apreensaun no halo buska domisiliáriu ba Farmasia Moris Foun ne’ebé lokaliza iha área Colmera, Suku Colmera, Postu administrativu Vera Cruz, Munisípiu Dili tanba suspeita hatama ai-moruk ilegál mai Timor-Leste.

Iha aktu detensaun, apreensaun no buska domisiliáriu ne’e, PNTL Departamentu Investigasaun kriminál konsege detein suspeitu na’in tolu ho isiál J, DI no HdC Suspeitu J nu’udar sidadaun Indonézia ne’ebé asume knaar hanesan Diretór ba iha Farmasia ne’e no DI nu’udar Xefe, sidadaun Indonézia, ne’ebé sai hanesan tékniku ba iha Farmasia Moris foun no HdC nu’udar timoroan ne’ebé mak sai jerente mós iha Farmasia Moris Foun.

“PNTL liuhosi Departamentu Servisu Investigasaun Kriminál Nasionál ezekuta mandadu hosi Tribunál ho NUC númeru NUC 0350/23. PNSIK hodi detein suspeitu na’in tolu ne’e inklui halo apreensaun no buska ba Farmasia Moris Foun Colmera,” Mandadu Judisiáriu hosi Tribunál Judisiál Primeira Instánsia Dili ne’ebé TATOLI asesu kinta, ohin.

Iha apreensaun no buska domisiliáriu ne’ebé DIK Nasionál halo iha kinta (22/02) ohin iha Farmasia Moris Foun Colmera ne’e, autoridade polisiál atu halibur evidénsia ne’ebé suspeita ba krimi hanesan ai-moruk sira ne’ebé mak deskonfia importa mai iha Timor-Leste ho dalan ilegál.

Apreensaun no buska domisiliáriu ne’e PNTL halo ba iha armajen rai ai-moruk iha Farmasia Moris Foun Colmera, Dili. Iha buska ne’e PNTL identifika ai-moruk item neen ne’ebé rai iha armazen Moris Foun iha Colmera laiha justifikasaun; ai moruk hirak ne’e hatama husi ne’ebé no hatama horibainhira, supeitu sira lakohi justifika ba PNTL bainhira PNTL halo buska ba ai-moruk sira ne’e.

Ai-moruk item ne’ebé laiha justifikasaun mak ida ho naran, Captopil 25 mg kuantidade 78, Patopanal 40mg ho kuantidade 21, Mizole Voune ne’e iha kaixa 120, Acce Tpix-MF ne’e iha 40 kaixa no Dextose ne’e iha kaixa neen.

Hafoin PNTL hato’o tiha buska ba ai-moruk sira ne’e halo kedan apreensaun imediatu ba ai-moruk item neen tanba laiha justifikasaun hosi jerente sira hosi Farmasia Moris Foun, ho nune’e PNTL asegura kedan evidénsia sira ne’e ba iha karreta nu’udar objetu krimi hodi sustenta ba iha prosesu investigasaun.

Bainhira PNTL konklui tiha apreensaun buska iha Farmasia Moris Foun Colmera, ekipa DIK Nasionál dezloka ba iha armazen, fatin rai ai-moruk, Farmasia Moris Foun ne’ebé lokaliza iha área Vila Verde, Suku Villa Verde, Postu administrativu Vera Cruz hodi kontinua halo buska iha fatin refere.

Iha prosesu buska ne’e, PNTL identifika katak ai-moruk sira rai iha armazen refere iha hotu lisensa, maibé uma ne’ebé Farmasia Moris Foun hodi uza rai ai-moruk ba ne’e laiha koñesimentu no autorizasaun lisensa hosi Ministériu Saúde.

Tanba, normalmente kuandu sidadaun ida atu loke Farmasia Medikamentu no importasaun no armazenamentu ba distribuisaun produtu medikamentu tenke rejistu iha Ministériu Saúde atu nune’e bele garante ba kontrolu ba efikasia seguransa produtu farmasia medikamentu atu labele fó ameasa ba Saúde públiku.

Ministériu Saúde atividade hothotu kona-ba farmasia nian tenke hetan autorizasaun  hodi hetan linsensa no atu hetan lisensa ida ne’e tenke  ema ne’ebé harii farmasia medikamentu tenke priense rekezitu 22, administrativamente.

Enkuantu, hafoin PNTL konklui tiha prosesu apreensaun no buska domisiliáriu ba iha Farmasia Moris Foun, polísia lori kedan suspeitu na’in tolu ba iha Departamentu Investigasaun Kriminál Nasional hodi detein iha sela detensaun Komandu PNTL Caicoli, Dili, durante oras 72 molok ba Tribunál hodi submete ba interogatóriu dahuluk.

Nune’e mós PNTL halo kedan apreensan hodi asegura kedan objetu krimi sira hanesan ai-moruk sira item neen ne’ebé polísia suspeita laiha justifikasaun  totál hosi jerente Farmasia Moris Foun.

Tuir informasaun ne’ebé jornalista TATOLI asesu iha terrenu katak DIK Nasionál sei kontinua ba halo apreensaun no buska ba ai-moruk sira ne’ebé mak Farmasia Moris Foun hatama hosi rai-li’ur ne’ebé oras ne’e daudaun ho kontentór ida iha Hela Portu Tibar nune’e bele nesesita ba prosesu investigasaun ba kazu ne’e.

Tuir observasaun ne’ebé jornalista TATOLI halo iha terrenu katak agora daudaun fatin Farmasia Moris Foun polísia tau ona liña polísia no servisu iha fatin ne’ebá paradu inklui armazen rai ai-moruk sira Farmasia Moris iha Colmera no Vila Verde inklui fatin laboratóriu ba teste ai-moruk nian ne’ebé lokaliza iha Colmera PNTL dada ona liña polísia hodi seladu metin hodi proibe ema labele bok fatin refere tanba prosesu ba investigasaun ba kazu ne’e sei iha hela prosesu nia laran.

 

Jornalista: Natalino Costa

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!