DILI, 26 fevereiru 2024 (TATOLI)- Prezidente Federasaun Boxe Amadora Timor-Leste (FBATL), Januario da Silva Brito, informa, problema ne’ebé atleta Boxe hasoru iha Asian Games iha nasaun Xina tinan kotuk ne’ebé la konsege tuir kompetisaun rezolve ona, nune’e kada tinan bele partisipa ona Asian Games.
“Sim, naton iha problema duni, maibé ami rezolve ona problema ne’e hamutuk ho Ministru Juventude Desportu Arte no Kultura (MJDAK). Tanba parte barak fó sala ami dehan ami la priense kritéria, maibé realidade la’os hanesan ne’e, ami priense hela kritéria ami to’o mak tarde, ida ne’e mak ami nia atleta labele joga, mas ita rezolve ona ne’ebé ita bele partisipa ona”, Januario hatete ba Agência TATOLI iha Benfica Colmera Dili, segunda ne’e.
Momentu ne’e, nia dehan priense hotu kritéria ka rekezitu hosi International Boxing Association (IBA) ho Word Boxing, maibé problema mak ekipa ba to’o tarde.
“Naton se ami to’o sedu ne’e ami nia atleta tuir duni kompetisaun, la’os dehan fali sira nia sertifikadu medikál laiha. maibé to’o tarde la tuir reuniaun tékniku mak ema hasai kedan Boxe Timor-Leste labele tuir kompetisaun,” Januario konta.
Tanba ne’e, responsavél másimu FBATL ne’e hatete, atleta Boxe liuliu selesaun nasionál laiha problema no jogu internasionál saida de’it sira bele kompete tanba kritéria hirak ne’ebé antes ne’e COTL fó sai kada atleta priense hela.
Razaun CONTL kona-ba atleta Boxe la tuir kompetisaun
Atleta Timoroan na’in-lima hosi FBATL la konsege kompete iha eventu internasionál Asian Games bá da-19 iha Xina, tanba la perienxe rekizitu hosi International Boxing Association (IBA) ho Word Boxing.
Tuir CONTL antes ne’e, Asian Games Vietnam 2022 hasoru mos problema nune’e, maibé CONTL konsege rezolve no husu ba federasaun atu hadia, maibé realidade kontinua no too Asian Games Xina Federasaun Boxe Internasionál mós labele rezolve situasaun ida-ne’e tamba Boxe mós iha Federasaun Mundiál rua; ida mak International Boxing Association (IBA) no World Boxing no tamba Boxe Internasionál enfrenta problema nune’e jogu Boxe nian bá Asian Games organiza direita husi Komité Olímpiku Internasionál no la’os federasaun boxe.
Atleta Nasionál ne’ebé mak atu kompete iha Asian Games mak Délio A mouzinho, Edegar Foe Quintas, Eligio Raimundo Gayo no Alexandre Milano no ekipa ofisiál sira ne’ebé akompaña maka Januario da Silva Brito (Prezidente FBATL), Rogerio Amaral Soares (Sekretáriu Jerál FBATL) no Sebastião da Silva (Treinadór Nasionál).
Notísia relevante:Asian Games : Dirijente FBATL regresa hafoin klarifika boxista na’in-haat ne’ebé diskualifikadu
Jornalista : Hortencio Sanchez
Editór : Florencio Miranda Ximenes
