Asian Games : Dirijente FBATL regresa hafoin klarifika boxista na’in-haat ne’ebé diskualifikadu
DILI, 27 setembru 2023 (TATOLI) – Prezidente Federasaun Boxe Amadora Timor-Leste (FBATL) Januario Brito, seidauk bele fó komentáriu kona-ba Boxista timoroan na’in-haat ne’ebé la konsege kompete iha Asian Games, maibé sei klarifika bainhira fila ona mai Timor-Leste.
“Ami to’o Dili mak ita ko’alia tamba ha’u iha ne’e hasoru malu tiha ona ho Sr. Ministru Juventude Desportu Arte no Kultura ne’ebé ha’u labele fó lai komentáru”, Januariu dehan ba Agência TATOLI via media sosial, kuarta ne’e.
Rekorda fali katak iha jogu ne’e, Timor-Leste nia delegasaun hamutuk ema na’in-56, hosi númeru ne’e atleta na’in- 26, restu seluk ekipa delegasaun.
Ekipa Timor-Leste aranka ba Xina iha 21 setembru no to’o iha Xina, iha 23 setembru tuku 12 kalan oras Xina nian.
Technical meeting hala’o iha 22 setembru, hahú iha tuku 10:00 to’o tuku 12:00 kalan oras Xina nian, maibé ekipa Timor-Leste liuliu modalidade Boxe labele partisipa tanba to’o tarde.
Tuir oráriu ne’ebé iha, jogu hahú 23 setembru no remata 08 outubru tinan ne’e.
Atleta nasionál ne’ebé mak atu kompete iha Asian Games mak Délio A mouzinho, Edegar Foe Quintas, Eligio Raimundo Gayo no Alexandre Milano no ekipa ofisiál sira ne’ebé akompaña maka Januario da Silva Brito (Prezidente FBATL), Rogerio Amaral Soares (Sekretáriu Jerál FBATL) no Sebastião da Silva (Treinadór Nasionál).
Tuir oráriu ne’ebé Komisaun Asian Games fó sai, Timor-Leste nia naran la tama iha lista tanba la konsege tuir Technical meeting.
Ba eventu ne’e, Governu Timor-Leste gasta osan hamutuk rihun $400 hodi fasilita modalidade hamutuk 10 no kontijente sira ne’ebé ba partisipa iha eventu ne’e.
Maibé tuir informasaun ne’ebé media nasionál balun fó sai katak Boxe la konsege partisipa iha eventu ne’e tanba la halo atualizasaun kona-ba relatóriu médiku kada Boxe nian ba Olímpiku Asian.
Notísia relevante : Asian Games-Modalidade Boxe Timor-Leste diskualifika tanba CONTL
Asian Games-Xanana kongratula Xina promove pás entre nasaun no atleta
Boxista Delio hahú prepara ba eventu Asian Games iha Xina
Jornalista: Hortencio Sanchez
Editór : Zezito Silva
