Boxista Delio hahú prepara ba eventu Asian Games iha Xina

DILI, 23 juñu 2023 (TATOLI) – Atleta hosi modalidade Boxe Timor-Leste, Delio Mouzinho, hahú ona preparativu hodi hein eventu Asian Games ne’ebé sei hala’o setembru mai iha nasaun Xina.

“Hanesan atleta, ha’u nafatin prepara-aan. Iha tinan ne’e sei iha tan eventu internasionál ida, Asian Games, eventu ne’e ha’u sei ba compete, agora daudaun ha’u halo hela treinamentu”, Delio dehan ba Agência TATOLI iha Dili, sesta ne’e.

Nia adianta, eventu ne’e sei hatudu prestasaun ne’ebé di’ak tanba treinadór hosi nasaun Cuba mak fó treinu.

“Ami halo treinamentu durante semana ida resin ona hamutuk ho treinadór hosi Cuba”, Delio dehan.

Tuir nia, oráriu treinamentu hahú iha segunda to’o sabadu dader no loraik iha Benfica Colmera Dili, treinamentu la’o di’ak tebes no agora foin hahú treinamentu fíziku.

“Agora treinamentu tama ona ba fíziku, antes ne’e ami foku liuba tátiku no tékniku”, nia haktuir.

Tuir oráriu ne’ebé fó sai ona, eventu ne’e sei hala’o iha Xina, hahú iha 23 setembru to’o 08 outubru 2023, sei partisipa hosi nasaun hotu iha Ázia.

Jornalista: Hortencio Sanchez

Editór : Zezito Silva