DILI, 28 fevereiru 2024 (TATOLI)- Diretór Jerál Juventude Ministériu Juventude Desportu Arte no Kultura (MJDAK), David Tomas de Deus, informa UNICEF apoiu osan hamutuk rihun $7 ba Alume Parlamentu Foinsa’e Timor-Leste (APFTL) hodi elabora kurríkulu no formasaun.
“UNICEF fó apoiu liuhosi konsultan hodi elabora kurríkulu ba Parlamentu Foinsa’e, hafoin sira mós fó apoiu ba formasaun durante loron tolu ba membru Parlamentu Foinsa’e sira atu hatene utuliza kurríkulu ne’e. Hosi ativiade ne’e sira mak apoiu hotu orsamentu hamutuk rihun $7,” informa David ba jornalista sira bainhira partisipa iha formasaun Parlamentu Foinsa’e nian durante loron tolu iha salaun Xanana Sport Centre Dili, kuarta ne’e.
Nia esplika, kontíudu hosi kurríkulu ne’e fó biban ba membru Parlamentu Foinsa’e hotu atu la’o tuir matéria hamutuk 11 ne’ebé hakerek ona iha kurríkulu ne’e.
“Kurríkulu ba programa Parlamentu Foinsa’e ne’e akumula matéria hamutuk 11 hanesan, edukasaun sívika, edukasaun sidadania, kapasidade edukasaun, karakterístika organizasaun, konkursu públiku, debate públiku, hanoin sosiál no seluk tan,” nia esplika.
Iha kurríkulu ne’e fó biban mós ba membru Parlamentu Foinsa’e atu buka dadus iha territóriu nasionál kona-bá problema sosiál, nune’e liu hosi plenária diskute hodi submete ba Ministériu relevante sira.
Iha okaziaun ne’e, Xefe Polítika Sosiál UNICEF, Soumen Ray, hatete, kooperasaun ne’ebé halao ho MJDAK atu hasa’e kapasidade membru Parlamentu Foinsa’e nian atu kobre asuntu oioin iha sosiedade.
“Apoiu ami nian atu kapasita Parlamentu Foinsa’e nian, atu kobre asuntu importante sira iha sosiedade, ida ne’e mak iha kurríkulu ne’e kobre matéria importante barak no fasilita mós formasaun ba membru Parlamentu Foinsa’e hotu iha Timor-Leste,” nia katak.
Tanba ne’e, nia agradese ba Governu ne’ebé koopera di’ak tebes ho UNICEF hodi implementa programa kriasaun kurríkulu ba membru Parlamentu Foinsa’e.
“Ami kontente no hakarak fó apoiu másimu liu tan hodi promove kapasidade joventude nian iha área oioin,” nia konklui.
Kurríkulu ne’e estabelese bazeia ba rezolusaun Governu númeru.23/2009, alterasaun dahuluk númeru 47/2017 ne’ebé ko’alia kona-bá programa Parlamentu Foinsa’e.
Parlamentu Foinsa’e eziste iha tinan 2010, ne’ebé harii hosi Sekretáriu Estadu Juventude Desportu (SEJD). To’o ohin loron Parlamentu Foinsa’e realiza nia programa durante períodu haat, maibé laiha kurríkulu ne’ebé hatu’ur iha programa própriu ba organizasaun refere.
Formasaun ne’e hala’o durante loron tolu hahú 28 fevereiru to’o 01 marsu. Partisipante iha formasaun ne’e hamutuk ema na’in 25 kompostu hosi membru Parlamentu Foinsa’e hosi kada munisípiu no funsionáriu MJDAK balun.
Notísia relevante:Parlamentu Foinsa’e konsensializa estudante partisipa ativa iha demokrasia
Jornalista: Hortencio Sanchez
Editór : Florencio Miranda Ximenes
