NITAG-TL fasilita formasaun ba profisionál saúde iha Oé-Cusse
OÉ-CUSSE, 29 fevereiru 2024 (TATOLI) – Komisaun Nasionál Imunizasaun Téknikál Advisory Group, (NITG, sigla inglés) Timor-Leste, fasilita formasaun ba profisionál saúde sira hamutuk na’in-30 iha Rejiaun Administrativa Espesiál Oé-Cusse Ambeno (RAEOA), kona-bá sistema imunidade no jestaun ba kazu efeitu sira.
Formasaun ne’e, realiza iha otél Inur Sakato, durante loron tolu, hahú iha loron 27-29 fevereiru semana ne’e.
Notísia relevante: Autoridade RAEOA kontrata INFPM ho kustu rihun $511 atu fornese ai-moruk
Iha enseramentu, Sekretáriu Rejionál ba Asuntu Saúde, Luís de Jesus Neno, reprezenta Autoridade RAEOA liuhosi servisu saúde Oé-Cusse, apresia ho polítika Nasionál Immunization Téknikál Advisory Group, tanba bele tulun kapasitasaun profisionál saúde sira iha Oé-Cusse.
Nune’e nia apela ba profisonál 30, katak, matenek ne’ebé simu ona, presiza hala’o iha fatin servisu, partilla tutan ba sira-ne’ebé la partisipa, nune’e bainhira akontese ligadu ho moras prevene imunizasaun bele atende ho di’ak.
“Ha’u hatene, imi na’in-30 ne’e mesak profisionál saúdu, matéria ne’ebé imi hetan, imi bele hatene kle’an liu ona, atu oinsa bele prevene atividade ne’ebé ita hala’o, atu labele hamosu buat ida ladi’ak iha fasilidade saúde,” Luís de Jesus Neno, ko’alia iha enseramentu, hala’o iha otél Inur Sakato, kinta ne’e.
Prezidente Komisaun Nasionál Immunization Téknikál Advisory Group, Mariano da Silva Marques, hateten, objetivu hosi formasaun ne’e atu hasa’e koñesimentu ba profisionál saúde sira kona-bá introdusaun vasina ba pasiente sira.
Prezidente NITAG, informa, durante formasaun, matéria prinsipál introdús ba profisionál sira durante loron tolu, kona-bá sistema imunidade ema-nian, oinsa jere jestaun ba kazu efeitu sira.
Nune’e mós, oinsá fasilita komunikasaun ba efeitu ruma akontese, nune’e bele hasa’e kbiit no forsa atu fó atendimentu di’ak ba komunidade sira.
“Atividade treinamentu (Formasaun) ne’e, relasiona ho investigasaun kona-bá efeitu depois vasinasaun, tanba bainhira ita vasina, iha nia efeitu balun dalaruma akontese, nune’e ita halo halo formasaun, nune’e ita fó treinamentu ba pesoál saúde sira iha RAEOA,” Prezidente NITAG ba Agência Tatoli hafoin ensera formasaun ne’e.
Nia informa, atividade ne’e la’ós foin dahuluk realiza iha Oé-Cusse, maibé antes ne’e hala’o ona, inklui munísipiu sira iha territóriu nasionál, no daudaun hala’o iha Oé-Cusse, foku ba médiku, parteira no enfermeira, tanba sira-ne’e servisu iha parte situasaun postus saúde sira inklui mós sentrál rejionál nian.
“Ha’u hanoin formasaun ne’e importante tebes, atu hasa’e sira-nia koñesimentu hodi jere prosesu ba reasaun moras ne’e rasik, nune’e bele hasa’e konfiánsa ba pasiente sira hosi simu vasina, tanba vasina maka sai hanesan mekanizmu prevensaun ne’ebé di’ak hodi proteje ita-nia ona sira hosi moras, nune’e sita-nia imunidade sai sorte liután,” nia katak.
Notísia relevante:Sekretáriu Rejionál Saúde Oé-Cusse la tolera pesoál saúde abandona serbisu
Entretantu, profisonál saúde na’in-30 ne’e, mai hosi médiku, enfermeira no enfermeira Hospital iha Referénsia Oé-Cusse, sentru saúde lima (5) no postu saúde 20.
Jornalista: Abílio Elo Nini
Editór: Evaristo Soares Martins
