DILI, 29 fevereiru 2024 (TATOLI)–Vise Primeiru-Ministru Koordenadór Asuntu Sosiál no Ministru Dezenvolvimentu Rurál no Abitasau Komunitária, Mariano Assanami Sabino, kinta ne’e, rekomenda ba National Cooperative Business Association (NCBA) no Kooperativa Kafé Timor (CCT, sigla portugés) kontinua funsiona klínika móvel hodi fó tratamentu ba populasaun sira iha área rurál.
“CCT la’ós de’it haree ba área ekonomia maibé ba mós asuntu sosiál hanesan loke klínika iha área rurál ne’ebé mak ita-nia Governu la to’o nomós klínika móvel signifika funsionáriu sira ho karreta ba trata saúde populasaun sira ne’ebé Governu seidauk harii postu saúde, ne’ebé Vise Primeiru-Ministru husu kontinua atividade ne’e tanba ita-nia to’os-na’in sira presiza tratamentu saúde,” Vise Primeiru-Ministru hateten hafoin ho estrutura hasoru malu iah Gabinete, Palásiu Governu
Notísia relevante : CCT reabilita ona kafé ektare 200 iha Ermera
Tratamentu saúde ne’ebé mak halo hosi klínika CCT ne’e gratuita, ne’ebé durante tuir dadus hatudu katak benefisia tebes populasaun rurál.
Entretantu, klínika móvel ne’e durante ne’e hala’o iha munisípiu rua hanesan Ermera no Aileu, no tuir dadus iha tinan 2022 fó ona tratamentu saúde ba populasaun liu rihun 10, daudaun kontinua realiza programa ne’e.
“Vise Primeiru-Ministru apresia tebes ho ami-nia programa sosiál ne’e tanba tulun tebes komunidade ne’ebé presiza tebes asisténsia saúde, maibé labele ba postu saúde tanba ho distánsia dook. Ami kompromete katak ami nafatin kontinua atividade ne’e ho ami-nia planu sira ne’ebé iha hodi lori bem star ba populasaun ne’ebé presiza ita-nia tulun,” nia tenik.
Jornalista : Antónia Gusmão
Editora : Julia Chatarina
